Eron va Saudiya Arabistoni futbol klublarining Osiyo Chempionlar ligasidagi o‘yinlari aprel—mayga ko‘chirildi

Osiyo futbol konfederatsiyasi, Eron va Saudiya Arabistoni o‘rtasidagi munosabatlarning keskinlashib ketgani sabab, Osiyo Chempionlar ligasi taqvimiga o‘zgartirish kiritdi. Bu haqda OFK rasmiy sayti xabar bermoqda .

Logo: OFK

Saudiya Arabistoni va Birlashgan Arab Amirliklari futboli rahbariyatlari, Eron va arab mamlakatlari o‘rtasida yuzaga kelgan kelishmovchiliklar sabab, terma jamoalar va klublar o‘rtasidagi barcha uchrashuvlarni, “jamoalar va delegatsiyalar xavfsizligini ta’minlash maqsadida”, qoldirish yo kechiktirishni so‘ragandi.
O‘z navbatida, Eron futbol federatsiyasi OFKdan futbolga siyosatni aralashtirmaslikni so‘ragan va Eronni “mintaqadagi eng xavfsiz mamlakatlardan biri” deb aytib o‘tgandi. EFFning ma’lum qilishicha, Eron “turli xalqaro musobaqalarda qatnashayotgan terma jamoalar va klublarning xavfsizligini ta’minlashga intiladi”.
Shundan kelib chiqib, OFK Musobaqalar qo‘mitasi Osiyo Chempionlar ligasi guruh bosqichi doirasida fevral—mart oylarida o‘tkaziladigan Eron va Saudiya Arabistoni klublari o‘rtasidagi uchrashuvlarni aprel—may oylariga ko‘chirishga qaror qildi.
Qo‘mita 2016-yil 15-martga qadar voqealar rivojini kuzatadi. Agar Eron va Saudiya Arabistoni o‘rtasidagi munosabatlar bu davrga kelib barqarorlashmasa, har ikki mamlakat klublari o‘rtasidagi keyingi uchrashuvlarning barchasi betaraf maydonlarda o‘tkaziladi.
Eslatib o‘tamiz, Saudiya Arabistoni tomonidan nufuzli shialik ulamosi Nimr an-Nimrning qatl etilishi Eron va Saudiya Arabistoni o‘rtasidagi munosabatlarining keskinlashuviga sabab bo‘ldi.
Batafsil | Подробно | Read more... Daryo