Alisher Navoiy muxlislari tuzgan ikkinchi devon Tokioda nashrdan chiqdi

Alisher Navoiy 24 yoshga kirganida uning she’rlarini muxislari yig‘di va devonga aylantirdi. Bu devonni 1968-yilda olim Hamid Sulaymonov fotonusxasini olib kelib, kitob shaklida chop qildirgan edi, deb yozadi Alisher Navoiy haqidagi sayt.

“Oqquyunli muxlislar devoni” faksimile nashri Foto: “AlisherNavoiy.uz”

2008-yilda Navoiyning yana bir devoni topildi. Bu ham uning muxlislari tomonidan 1471-yil tartib berilgan ekan. Farqli jihati, bu devonni Xurosonga chegaradosh bo‘lgan mamlakat – Oqquyunlilar saltanatida tayyorlashgan va undagi she’rlar qarluq lahjasidan o‘g‘uz lahjasiga moslangan. Devonni o‘z davrining taniqli xattoti Abdurahim Xorazmiy ko‘chirgan.
Mazkur devonni fanga ma’lum qilgan olim Aftondil Erkinov uning fotonusxasini (faksimile) Tokioda kitob shaklida nashrdan chiqardi. Kitobda Navoiyning 1465—1471-yillarda yozilgan she’rlari bilan tanishish mumkin.

Devon sahifasi Foto: “AlisherNavoiy.uz”

Devon shartli ravishda “Oqquyunli muxlislar devoni” deb nomlandi. Kitobning kirish qismidan o‘rin olgan uch tilda (rus, o‘zbek, ingliz) berilgan katta hajmdagi ilmiy maqolada Alisher Navoiy ijodi va mazkur devonning tuzilishi, topilishiga doir muhim ma’lumotlar aks etgan.
Eslatib o‘tamiz, Navoiyning bu ikki devoni tuzilganda ham hali shoir o‘z she’rlarini rasman to‘plam holiga keltirmagan edi.
Batafsil | Подробно | Read more... Daryo