Toshkent viloyati sobiq hokimi Ahmadjon Usmonovning senatorlik vakolati tugatildi

O‘zbekiston Markaziy saylov komissiyasida 4-fevral, payshanba kuni komissiya raisi Mirzo-Ulug‘bek Abdusalomov rahbarligida majlis bo‘lib o‘tdi. Bu haqda MSK matbuot xizmati xabar berdi .

Foto: “Fattohhon.com”

Majlisda O‘zbekiston Oliy Majlisining Senati a’zosi Ahmadjon Usmonovning xalq deputatlari Toshkent viloyati Kengashi deputati vakolati tugatilganligi munosabati bilan uning senatorlik vakolatini muddatidan ilgari tugatish to‘g‘risida masala ko‘rib chiqildi va tegishli qaror qabul qilindi .
Ma’lumot uchun, Ahmadjon Usmonov Toshkent viloyatidan Oliy Majlis Senatiga saylangan bo‘lib , Senatning Qonunchilik va sud-huquq masalalari qo‘mitasi a’zosi edi. “O‘zbekiston Respublikasi Oliy Majlisiga saylov to‘g‘risida”gi qonunning 61-moddasiga muvofiq , bo‘shab qolgan o‘rinlarga senatorlarning saylovi hududiy davlat hokimiyati vakillik organlari deputatlarining tegishli qo‘shma majlislarida o‘tkaziladi.
Eslatib o‘tamiz, 4-fevral, payshanba kuni O‘zbekiston Prezidenti Islom Karimov Toshkent viloyati hokimi Ahmadjon Usmonovni lavozimidan ozod etish to‘g‘risidagi farmonni imzoladi. Shu kuni Sodiq Abdullayev Toshkent viloyatining yangi hokimi etib tayinlandi . U bungacha viloyatning Zangiota tumaniga hokimlik qilib kelayotgan edi.
Batafsil | Подробно | Read more... Daryo