Mark Sukerberg Facebook ahlini Xitoy Yangi yil bayrami bilan xitoy tilida tabrikladi

Facebook ijtimoiy tarmog‘i asoschisi va rahbari Mark Sukerberg 8-fevralga o‘tar kechasi nishonlanadigan Bahor bayrami (Oy taqvimi bo‘yicha Yangi yil) munosabati bilan videotabrigini e’lon qildi, deb yozadi “TASS”.

Videodan kadr. Skrinshot: Facebook / Mark Zuckerberg

Rolikda milliarder rafiqasi Prissilla Chan va ikki oylik qizi Maks bilan barcha foydalanuvchilarni xitoy tilida tabrikladi.
Sukerberg Oy taqvimi bo‘yicha Yangi yilni oilasi va do‘stlari davrasida nishonlashini aytib, bu Yangi yil qizi Maks uchun ham juda muhim ekanligini ta’kidladi. “Chunki biz u uchun xitoycha ism tanladik. Uning ismi Chen Minyuy. Chen — uning onasining familiyasi, Minyuy esa ‘ertaga’ va ‘olam’ so‘zlari iyeroglifidir, bu bizning butun dunyo uchun yanada yorug‘ kelajak haqidagi umidlarimizni anglatadi”, — dedi u.
Nashr ta’kidlashicha, Xitoy hududida Facebook taqiqlangan. Biroq Xitoy OAVlari xitoy tili va madaniyatini o‘rganayotgan Mark Sukerberg hayotini faol tarzda yoritib boradi.
Batafsil | Подробно | Read more... Daryo