AQShda Virgin Galactic kompaniyasi sayyohlar uchun yangi kosmik kemani taqdim etdi

Amerikaning Virgin Galactic kompaniyasi 19-fevral, juma kuni sayyohlar uchun mo‘ljallangan SpaceShipTwo suborbital kosmik kemasining yangi modelini ilk marotaba namoyish etdi, deb yozadi “TASS”. U bir yarim yilcha avval halokatga uchragan namuna o‘rniga yasaldi.

Foto: EPA

Kosmolyotni kompaniya xo‘jayini — britaniyalik Richard Brenson namoyish qildi. Kemaning tashqi qiyofasi 2014-yil oktabrida Kaliforniya janubidagi Moxave cho‘lida sinov parvozini amalga oshirish chog‘ida halokatga uchragan avvalgi modeldan farq qilmaydi. VSS Unity deb nom olgan yangi model ancha xavfsizroq holatga keltirilgani, kosmolyotni boshqarish funksiyalarining ko‘pchiligi avtomatlashtirilgani ta’kidlandi.
Avvalgi model halokati oqibatida uchuvchilardan biri hayotdan ko‘z yumgan, ikkinchisi jarohat olgan edi. Ekspertlar o‘shanda putur ko‘rgan kompaniya obro‘si yangi model muvaffaqiyatli tarzda sinovdan o‘tgach, tiklanishini qayd etdi.
Kosmolyotda ikki soatlik sayohat 250 ming dollarni tashkil etishi mumkin. Sayohat davomida odamlar vaznsizlik holatiga tushib ko‘radi, shuningdek, Yerni 100 km balandlikdan tomosha qiladi.
SpaceShipTwo o‘z bortiga ikki uchuvchi va olti yo‘lovchini sig‘dira oladi. Unda koinotga uchish istagini 800 dan ziyod kishi bildirishga ulgurdi, ular orasida aktyorlar Tom Xenks va Anjelina Joli ham bor.
Batafsil | Подробно | Read more... Daryo