Toshkentga favqulodda qo‘ngan AZUR air samolyoti “O‘zbekiston havo yo‘llari”dan hozircha texnik yordam so‘ragani yo‘q

Dvigateldagi moyning past darajasi datchigi ishlab ketgani sabab 26-fevral kuni Toshkentda majburiy qo‘nishni amalga oshirgan AZUR air aviakompaniyasining Boeing-767-300 samolyoti hozircha “O‘zbekiston havo yo‘llari”dan texnik yordam so‘ragani yo‘q. Bu haqda “O‘zbekiston havo yo‘llari” milliy aviakompaniyasi bosh direktori birinchi o‘rinbosari Akmal Akbarov “Daryo”ga ma’lum qildi.

Foto: “AirTeamImages.com”

“AZUR air aviakompaniyasi samolyoti xalqaro qoidalarga muvofiq, Toshkent aeroportiga qo‘ndi. Hozircha aviakompaniya texnik yordam ko‘rsatishni so‘rab ‘O‘zbekiston havo yo‘llari’ga murojaat qilgani yo‘q”, — dedi Akmal Akbarov.
Akmal Akbarovning qayd etishicha, AZUR air aviakompaniyasi Toshkent aeroportiga favqulodda qo‘ngan Boeing-767-300 samolyotidagi nosozlikni bartaraf etish uchun “O‘zbekiston havo yo‘llari”ga murojaat qilishi yoki o‘z texnik mutaxassislarini Toshkentga yuborishi mumkin.
“Moskva — Pxuket (Tailand)” yo‘nalishida parvoz qilgan samolyot bortida 327 yo‘lovchi bo‘lgan. Rossiyaning G‘arbiy Sibir transport prokuraturasi ma’lumotlariga ko‘ra , AZUR air aviakompaniyasi yo‘lovchilarni Toshkent vaqti bilan 16:00 da manzilga yetkazish uchun ikkita zaxira Boeing-757-300 samolyotlarini ajratishni rejalashtirmoqda.
Batafsil | Подробно | Read more... Daryo