Oliy Majlis Senati Kengashi majlisida fuqarolar yig‘inlari raislari va ularning maslahatchilari sayloviga tayyorgarlik muhokama qilindi

O‘zbekiston Respublikasi Oliy Majlisi Senati Kengashining 5-mart kuni bo‘lib o‘tgan majlisida fuqarolar yig‘inlari raislari va ularning maslahatchilari sayloviga tayyorgarlik ko‘rish va uni o‘tkazish to‘g‘risidagi masala muhokama qilindi. Bu haqda Senat Axborot xizmati ma’lum qildi .

Foto: O‘zbekiston Respublikasi Oliy Majlisi Senati Axborot xizmati

Muhokama jarayonida Kengash a’zolari tomonidan ta’kidlab o‘tilganidek, saylovga tayyorgarlik ko‘rish va uni o‘tkazish borasidagi eng muhim talab fuqarolar o‘zini o‘zi boshqarish organlari saylovi jarayonining barcha ishtirokchilari tomonidan amaldagi qonun hujjatlari talablariga og‘ishmay rioya etilishidan, raislar va ularning maslahatchilari lavozimlariga nomzodlar bilan fuqarolarni batafsil tanishtirishdan iborat.
Masalani muhokama qilish yakunlari bo‘yicha oldingi saylovlar tajribasi va qonunchilik hujjatlari talablarini hisobga olgan holda, Kengash “Fuqarolar yig‘inlari raislari (oqsoqollari) va ularning maslahatchilari sayloviga tayyorgarlik ko‘rish hamda uni o‘tkazish to‘g‘risida” qaror qabul qilib , unda saylovni o‘tkazish muddatini belgiladi, saylovni tashkil etish hamda o‘tkazishga doir tadbirlar rejasi, saylov byulletenlari namunalarini tasdiqladi.
Shuningdek, Kengash tomonidan saylovni tashkil etish hamda o‘tkazishga ko‘maklashuvchi komissiya tuzildi va uning tarkibi tasdiqlandi. Komissiya tarkibiga parlament palatalari, “Mahalla” xayriya jamoat fondi, O‘zbekiston Respublikasi Adliya vazirligi, O‘zbekiston Kasaba uyushmalari federatsiyasi kengashi, “Kamolot” yoshlar ijtimoiy harakati, Fuqarolik jamiyati shakllanishini monitoring qilish mustaqil instituti, O‘zbekiston Milliy teleradiokompaniyasi, O‘zbekiston Milliy axborot agentligi, Respublika Ma’naviyat targ‘ibot markazi, boshqa vazirlik va idoralarning vakillari kiritildi.
Batafsil | Подробно | Read more... Daryo