Chaqaloqlar ratsioniga yeryong‘oq va tuxum kiritilishi kelgusida allergiya paydo bo‘lishi xavfini kamaytirishi aniqlandi

Chaqaloqlar ovqatlanish ratsioniga yeryong‘oq va tuxum kabi allergen mahsulotlarning kiritilishi ularda kelgusida allergiya paydo bo‘lishi xavfini kamaytiradi. Londondagi Sent-Jorj universiteti, qirollik kolleji tadqiqotchilari va “Gays end Sent-Tomas” kasalxonasi mutaxassislari shunday xulosaga keldi. Bu haqda “TASS” xabar bermoqda .

Foto: EPA

O‘tkazilgan tadqiqot doirasida olimlar Angliya va Uelsdagi 1,3 ming nafar chaqaloqni kuzatgan. Ular ikki guruhga bo‘lingan: birinchi guruhdagi chaqaloqlar olti oygacha faqat ko‘krak suti bilan boqilgan va shundan keyingina ularning ratsioniga allergen mahsulotlar kiritilgan. Ikkinchi guruhdagi bolakaylar esa uch oyligidan boshlab ko‘krak sutiga qo‘shimcha olti turdagi allergen mahsulotlar — qaynatilgan tuxum, sut, bug‘doy, yeryong‘oq, baliq va kunjut bilan boqilgan.
Shundan so‘ng olimlar bolalarni uch yil davomida kuzatgan va ikkinchi guruh vakillarida allergiya rivojlanishi xavfi birinchi guruhdagilarga nisbatan 67% kam bo‘lganini aniqladi. Masalan, olti oy davomida faqat ko‘krak suti berilgan bolalarning 5,5 foizi tuxumga toqat qilolmasliklarini namoyish etgan, ikkinchi guruhda esa bu ko‘rsatkich 1,4 foizdan oshmagan. Yeryong‘oq bilan bog‘liq natijalar esa bundan ham ajablanarli bo‘lgan: dunyodagi eng kuchli allergenlardan biri hisoblanadigan ushbu mahsulotni uch oyligidan boshlab qabul qila boshlagan 310 nafar go‘dakdan hech birida keyinchalik yeryong‘oqqa allergiya paydo bo‘lmagan.
Olimlar mahsulotlarga immunitet chaqaloqlarga ularni ma’lum bir me’yor bilan — haftasiga kamida 2 gramm yeryong‘oq yoki tuxum oqi proteini berilganida shakllanishini aniqlagan.
Batafsil | Подробно | Read more... Daryo