Filippin termasi bosh murabbiyi: O‘zbekiston g‘alaba qozonishga majbur

Jahon chempionati—2018 ikkinchi saralash bosqichi 4-tur o‘yinlari doirasidagi Filippin – O‘zbekiston uchrashuvi oldidan matbuot anjumani tashkil etildi va uning ikkinchi qismida Filippin terma jamoasi bosh murabbiyi Tomas Duliy va jamoa hujumchisi Fil Yangxazbend ishtirok etdi, deb xabar beradi O‘zbekiston futbol federatsiyasi matbuot xizmati.

Foto: the-uff.com

“O‘yindan oldin kayfiyatimiz juda yaxshi. Bahrayn va Yamanga qarshi o‘yinlardagi g‘alabalardan keyin, ertangi o‘yinni katta ishtiyoq bilan kutyapmiz. Navbatdagi o‘yinga deyarli to‘rt hafta tayyorgarlik ko‘rdik. Ayrim futbolchilarimiz jamoaga kechroq kelib qo‘shilganiga qaramay tayyorgarlik jarayonini to‘g‘ri olib bordik, deb o‘ylayman. Ammo bu futbol va unda hamma narsa bo‘lishi mumkin. Biz ertaga juda tajribali va kuchli jamoalardan biriga qarshi maydonga tushamiz, ular bizdan FIFA reytingida 50 pog‘ona yuqorida. Biz raqibni juda yaxshi o‘rganib chiqdik. Biroq, tushunarliki, bu narsa hali g‘alabani ta’minlamaydi. Ertaga g‘olib bo‘lish uchun bizga biroz omad, muxlislarning qo‘llab-quvvatlashlari ham kerak bo‘ladi. Bizni qiziqarli o‘yin kutyapti”, — deya o‘yin haqidagi fikrlarini bildirdi Duliy.
Fil Yangxazbend ham uchrashuv haqida to‘xtalib, shunday dedi: “Murabbiy aytib o‘tganidek o‘yin oldidan jamoaning kayfiyati a’lo darajada. Biz o‘yinga yaxshi tayyorgarlik ko‘rdik. Raqib futbolchilarini yaxshi o‘rgandik. Shuningdek, o‘z imkoniyatlarimizni ham yaxshi bilamiz. Ko‘rsatmalarni to‘g‘ri bajarsak va yaxshi o‘yin ko‘rsata olsak, maqsadimizga erishamiz, deb ishonaman. Ha, O‘zbekiston Osiyoning top jamoalaridan biri. Biroq biz jahon chempionati yoki Osiyo kubogi kabi musobaqalarda o‘ynashni istasak bu kabi kuchli jamoalarni yengga olishimiz kerak”.
Tomas Duliy jurnalistlar savollariga javob berar ekan o‘yinda Filippin autsayder ekani, O‘zbekistonga qarshi uchrashuvda mag‘lub bo‘lish qo‘rqinchli emasligi va bu narsa o‘z jamoasiga qo‘l kelishi mumkinligini ta’kidladi.
“Fil, albatta, jamoamizdagi eng yetakchi futbolchilardan biri. Albatta, O‘zbekiston terma jamoasi ham uni ko‘zdan qochirmaslikka urinishi aniq. Ularning tarkibida esa deyarli barcha futbolchilar xavfli. Biz bu o‘yinda autsaydermiz. Buni hech kim inkor qilayotgani yo‘q. Ular g‘alaba qozonishga majbur. Ular albatta oldinga tashlanadi. Biz esa ularning ojiz nuqtalarini topishga va shundan foydalanishga harakat qilamiz. Bu normal holat. Bizning yo‘qotadigan narsamiz yo‘q. Ular reytingda 76-o‘rinda. Bu ajoyib natija. Ularda Rossiya, Xitoy, Janubiy Koreyada o‘ynaydigan futbolchilar bor. O‘zbekistonga yutqazish – qo‘rqinchli emas. O‘yinda favorit hisoblanib, yutqazib qo‘ysang, ha, bu juda yomon. Ammo ertangi o‘yinda yutqazish fojia emas. Bilasizmi, shuning o‘zi ham bizga qo‘l kelishi mumkin. Jamoa ortiqcha bosimsiz harakat qila oladi. Yagona maqsadimiz filippinliklarni xursand qilish va shunga intilamiz ham”, — deydi Filippin terma jamoasi bosh murabbiyi.
Batafsil | Подробно | Read more... Daryo