Shimoliy Koreya yadro qurolini jangovar tayyorgarlik holatiga keltirdi

Shimoliy Koreya yadro quroli AQSh va Janubiy Koreya harbiy mashqlari munosabati bilan jangovar tayyorgarlik holatiga keltirildi. Bu haqda KXDR davlat mudofaa qo‘mitasi bayonotida ma’lum qilingan, deya xabar beradi “Vedomosti”.

Foto: Slavpeople

“Dushmanlarimizning hamkorlikdagi harbiy mashqlari biz tomonimizdan yadro urushini alanga oldirishga qaratilgan ochiq-oshkor provokatsiya hisoblanishi sababli bunga nisbatan javobimiz oldini oluvchi va qaqshatqich bo‘ladi. Oliy rahbariyat tomonidan imzolangan Janubiy Koreyani ozod qilish va AQShga zarba berish bo‘yicha tezkor rejaga egamiz. Mazkur rejaga binoan Janubiy Koreya hududidagi asosiy obyektlar nishonga olingan zarba vositalari jangovar tayyorgarlikka keltirilgan, shuningdek, Amerika tajovuzkor kuchlarining Osiyo—Tinch okeani mintaqasi va AQShdagi bazalariga qaratilgan yadro zarbasining qudratli vositalari doimiy navbatchilikda turibdi. Ularni harakatga keltirsak, provokatsiyalarning asosiy manbalari bir zumda olov va kulga, AQSh yadro kuchlari esa, ular qayerda bo‘lishidan qat’iy nazar, metall chiqindisiga aylanadi”, — deyiladi mazkur bayonotda.
Eslatib o‘tamiz, AQSh va Janubiy Koreya 7-mart, dushanba kuni 30-aprelga qadar davom etadigan Key Resolve va Foal Eagle nomli harbiy mashg‘ulotlarni boshladi . Bu ikki davlatning harbiy hamkorlik tarixidagi eng yirik o‘quv mashg‘ulotlari bo‘ladi.
Batafsil | Подробно | Read more... Daryo