AQSh maxsus bo‘linmasi Iroqda IShIDning kimyoviy qurol bo‘yicha yetakchisini qo‘lga olgani haqidagi xabarlar inkor etildi

AQSh maxsus bo‘linmasi Iroqda IShIDning kimyoviy qurol ishlab chiqarish bilan shug‘ullangan yetakchilaridan birini qo‘lga olgani haqidagi xabarlar asosga ega emas. Bu haqda Iroq parlamentining mudofaa va xavfsizlik qo‘mitasi rahbari Hakim az-Zamiliy ma’lum qildi, deya xabar beradi “TASS”.

Foto: Reuters

“Qo‘mita AQSh IShIDning kimyoviy qurol bo‘yicha mutaxassisini qo‘lga olgani haqidagi bayonotni o‘rganib chiqdi va bu yangilik haqiqatga to‘g‘ri kelmasligini bildiradi. Amerikaliklar ushlagan jangarining ismi-sharifi o‘ylab topilgan va u o‘ziga taqalayotgan ayblarda gumon qilinmoqda, xolos. Uning IShID kimyoviy quroli yaratilishiga aloqadorligiga oid hech qanday dalillar yo‘q. Iroq armiyasi IShID jangarilariga jiddiy zarbalar berayotgan chog‘da bunday ma’lumotlarni e’lon qilishdan ko‘zda tutilgan maqsad iroqliklar yuragida qo‘rquv va nafratni alangalatishga qaratilgan”, — deya ta’kidlagan Hakim az-Zamiliy.
Eslatib o‘tamiz, oldinroq AQSh maxsus bo‘linmasi IShID yetakchilaridan Sulaymon Daud al-Afariyni qo‘lga olgani, u Vashingtonga jangarilarning kimyoviy qurollar yaratiladigan obyektlari haqida ma’lumotlarni taqdim etgani to‘g‘risida xabar berilgandi .
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Batafsil | Подробно | Read more... Daryo