Shaxmat bo‘yicha O‘zbekiston ayollar termasi “Osiyo Millatlar Kubogi–2016” turnirida Xitoyni shov-shuvli tarzda mag‘lubiyatga uchratdi

BAAning Abu-Dabi shahrida shaxmat bo‘yicha “Osiyo Millatlar Kubogi–2016” musobaqasining 6-tur uchrashuvlari bo‘lib o‘tdi. Chempionatda ishtirok etayotgan O‘zbekiston ayollar terma jamoasi ushbu turda shov-shuvli natijani qo‘lga kiritdi, deb xabar beradi “Olamsport”.

Foto: “Olamsport”

O‘zbekistonlik shaxmatchi qizlar musobaqaning birinchi raqamli ishtirokchisi – Xitoy terma jamoasini mag‘lub etdi. O‘zbekiston vakilasi Nafisa Mo‘minova qora donalarda harakat qilishiga qaramay, dunyoning uchinchi raqamli shaxmatchisi, yaqinda o‘tkazilgan Tehron Gran-Prisi g‘olibasi Szyuy Venszyundan ustun keldi.
Qolgan o‘zbekistonlik shaxmatchilar kuchli raqibalari bilan durang o‘ynadi. Irina Gevorgyan, Gulruhbegim Tohirjonova va Sevara Boymurodova reytingda o‘zlaridan ancha yuqorida turgan raqibalaridan ochko tortib olishga muvaffaq bo‘ldi.
O‘zbekiston terma jamoasi 6-turdan so‘ng 10 ochko bilan kuchli uchlikdan joy olgan. Vyetnam va Qozog‘iston terma jamoalari hisobida ham 10 tadan ochko bor. Musobaqaning 7-turida  o‘zbekistonlik shaxmatchi qizlar Vyetnam terma jamoasi bilan hisob-kitob qiladi.
Batafsil | Подробно | Read more... Daryo