“Panama hujjatlari” chop qilingach, UEFAga tintuv uchun kelishdi

Shveysariya politsiyasi “Panama hujjatlari” chop qilinganidan so‘ng, UEFAning Nyondagi ofisiga tintuv uchun keldi, deya xabar bermoqda “RBK”. Ushbu hujjatlarda FIFAning yangi prezidenti va UEFA sobiq bosh kotibi Janni Infantino nomi tilga olinadi.

Foto: UEFA

Politsiyani egalari Ugo va Mariano Xinkins bo‘lgan Cross Trading kompaniyasiga Chempionlar ligasi matchlarini translyatsiya qilish huquqi sotilishi bilan bog‘liq hujjatlar qiziqtirgan. Ularga ham Infantino imzo qo‘ygan.
Tinch okeanidagi Niue orolida ro‘yxatga olingan Cross Trading ofshor kompaniyasi bunday huquqni sotib olish uchun UEFAga 111 ming dollar to‘lagan. Shu bilan birga, huquq Teleamazonas kompaniyasiga 311 ming dollarga qayta sotilgan, bu haqda “Panama hujjatlari”da aytiladi.
UEFA tintuvlarni izohlar ekan, huquqni himoya qilish organlari bilan to‘liq hamkorlik qilayotganini aytdi. Infantinoning o‘zi avvalroq “uning halolligi shubha ostiga olinganidan tashvishda” ekanligini bildirgan. U, shuningdek, shartnomani imzolayotib, qonunni buzmaganini ta’kidlagan. Bundan tashqari, UEFA Cross Trading ofshor kompaniyasi Teleamazonas kompaniyasi uchun vositachi rolini o‘ynaganini qayd etgan.
Batafsil | Подробно | Read more... Daryo