O‘zbekistonlik tennischi Jo‘rabek Karimov Qarshidagi turnirning finaliga yo‘l oldi

O‘zbekistonlik Jo‘rabek Karimov Qarshi shahrida yakuniga yetib borayotgan Karshi ITF Pro Circuit tennis turnirining finaliga yo‘l oldi.

Foto: Getty Images

Xalqaro tennis federatsiyasi rasmiy saytining ma’lum qilishicha , dastlabki yarim finalda 17 yoshli Jo‘rabek Karimov o‘zbekistonlik boshqa bir tennischi, 17 yoshli Humoyun Sultonovga qarshi bahs olib bordi. Bir soatu 21 daqiqa davom etgan mazkur bellashuvda Jo‘rabek 6:4, 6:2 hisobida zafar quchdi.
Karimov musobaqaning ikkinchi yarim finalida chexiyalik Mixal Konechnini 3:6, 5:7 hisobida mag‘lubiyatga uchratgan Belarus vakili Ilya Ivashka bilan bosh sovrin uchun kurash olib boradi.
Eslatib o‘tamiz, Jo‘rabek Karimov ikkinchi davrada belgiyalik Sander Jilleni 4:6, 6:4, 6:4 , chorak finalda esa belaruslik Yaraslav Shilani 6:3, 6:1 hisobida mag‘lubiyatga uchratgan edi.
Shuningdek, o‘zbekistonlik 21 yoshli Sanjar Fayziyev bilan tandem hosil qilgan Jo‘rabek musobaqaning juftliklar bahsi finaliga chiqdi. Final uchrashuvida Karimov/Fayziyev juftligi Sumit Nagal (Hindiston) hamda Ti Chen (Xitoy Taypeyi) duetiga qarshi bahs olib boradi.
Batafsil | Подробно | Read more... Daryo