Airbus va Siemens elektrik samolyotlar ishlab chiqish bo‘yicha hamkorlikni yo‘lga qo‘yadi

Yevropaning Airbus Group SE aviakonserni Germaniyaning Siemens AG sanoat konglomerati bilan elektrik samolyotlar ishlab chiqish bo‘yicha hamkorlik qiladi. Bu haqda, MarketWatch nashriga asoslanib, “Interfaks” xabar bermoqda .

Foto: 3DNews

Bu yo‘nalishdagi tadqiqotlar bilan 200 muhandis shug‘ullanadi. 2020-yilga kelib ikki korporatsiya elektr va gibrid energiya manbalarini aviatsiyada qo‘llash mumkinligini isbotlashni ko‘zlamoqda.
“2030-yilga kelib 100 dan kamroq o‘ringa ega yo‘lovchi samolyotini gibrid energetik tizim yordamida harakatga keltirish mumkin bo‘lishiga aminmiz, va biz buning imkoniyatlarini Siemens singari birinchi darajali sheriklar bilan tadqiq etmoqchimiz”, — dedi Airbus bosh ijrochi direktori Tom Enders.
Siemens vakili Jo Kezerning so‘zlariga qaraganda, Airbus bilan qo‘shma loyiha ustida yangi texnologik trendlarni tadqiq etishga ixtisoslashgan Innovation AG bo‘linmasi ishlaydi.
Oxirgi yillarda asosan 100 dan ortiq o‘ringa ega samolyotlar ishlab chiqaruvchi Airbus yoqilg‘i iste’molini kamaytirish maqsadida elektr dvigatellari texnologiyalaridan foydalanishga investitsiya kiritmoqda. Quyidagi videorolikda uning E-Fan nomli ikki o‘rinli elektrik samolyoti tanishtirilgan. Namunaviy nusxa Le-Burjdagi aviakosmik salonda 2013-yilda namoyish etilgandi.
Batafsil | Подробно | Read more... Daryo