Toshkentdagi kafelardan biri o‘z chiqindilarini bekat yoniga olib chiqib qo‘yishi tanqid ostiga olindi

Facebook’dagi “Potrebitel.uz” guruhi foydalanuvchilaridan birining ma’lum qilishicha , Toshkentning Bodomzor dahasida joylashgan “Al-Delfin” kafesi xodimlari har tunda katta qora qoplardagi chiqindilarni yaqin oradagi bekat yonida qoldiradi.

Foto: Facebook / “Potrebitel.uz”

“Bu holatni haddan tashqari pastkashlik va bekatda transport kutayotganlarga nisbatan hurmatsizlik belgisi, deb hisoblaydiganlar orasida men yolg‘iz emasdirman?”, — deb yozadi kafe yonidagi chiqindilarni olib ketayotgan chiqindi tashuvchi mashina suratlarini e’lon qilgan foydalanuvchi.

Foto: Facebook / “Potrebitel.uz”

Muhokama jarayonida bir guruh foydalanuvchilar bu suratlarga qarab, chiqindilarni aynan kafe xodimlari olib chiqib qo‘yganini isbotlab bo‘lmasligini va holat uchun aynan kafeni ayblash noo‘rin ekanligi haqida fikr bildirgan.

Foto: Facebook / “Potrebitel.uz”

Xususan, foydalanuvchilardan biri ertalab muhokamaga sabab bo‘lgan joydan o‘tgani va u yerda hech qanday chiqindi yo‘qligini yozgan. Bunga javoban suratlar muallifi chiqindilar har kuni kechasi 24:00—1:00 oralig‘ida olib chiqilishi va har tong, soat 7:00 gacha “Maxsustrans” mashinasida olib ketilishini bildirgan.
Foydalanuvchilarning boshqa bir guruhi har qanday holatda ham jamoat joyiga chiqindi tashlash nomaqbul harakat ekanligini, issiq kunlar kelishi bilan bu chiqindilarning hidiga chidab bo‘lmasligini ta’kidlab, holat yuzasidan Yagona portal orqali shikoyat qilishni tavsiya qilgan.
Batafsil | Подробно | Read more... Daryo