O‘zbekiston milliy terma jamoasi iyun oyida Tailand qirol kubogida qatnashadi

Tailand futbol assotsiatsiyasi prezidenti Samyot Pumpunmuangning so‘zlariga ko‘ra, O‘zbekiston milliy terma jamoasi 2016-yilning iyun oyida bo‘lib o‘tadigan Tailand qirol kubogi musobaqasida qatnashishga rozilik bergan. Bu haqda “Footballchannel.asia” xabar tarqatdi .

Foto: Upic.me

Tailand va O‘zbekiston terma jamoalaridan tashqari turnirda Kosta-Rika, Trinidad va Tobago, Gaiti, shuningdek, Xorvatiya B terma jamoalarining ishtirok etishi ham kutilyapti.
“Biz bir qator terma jamoalarni musobaqaga taklif qildik. O‘zbekiston va Xorvatiya B termalari unda ishtirok etishga rozilik berdi. Kosta-Rika, Trinidad va Tobago kabi termalar bilan esa muzokaralar davom etmoqda. Tailandgacha bo‘lgan masofa ancha uzoq bo‘lishiga qaramay, Gaiti terma jamoasini ham turnirga taklif qilishni istadim. Chunki Gaiti prezidenti mening do‘stim”, — deb Samyot Pumpunmuangning so‘zlaridan iqtibos keltirilgan.
Bangkokpost ma’lumotiga ko‘ra, 28-aprel kuni Tailand poytaxtiga FIFAning yangi prezidenti Janni Infantino tashrif buyuradi hamda mamlakat futbolining yaqin kelajakdagi rejalari bilan tanishadi, mamlakat bosh vaziri bilan uchrashuvda bo‘ladi.
Bu haqda ma’lum qilgan Tailand futbol assotsiatsiyasi prezidenti, qo‘shimcha tariqasida Qirol kubogi haqida ham to‘xtalgan. Uning so‘zlariga ko‘ra, Xorvatiya terma jamoasi 10-iyundan start oladigan Yevropa chempionatida ishtirok etishi munosabati bilan, Xorvatiya futbol federatsiyasi Qirol kubogiga mamlakatning ikkinchi terma jamoasini yuborishini ma’lum qilgan.
Qayd etish kerak, 2015-yilning fevral oyida O‘zbekiston olimpiya terma jamoasi ham Qirol kubogida ishtirok etgandi. O‘sha musobaqadan keyin jamoa bosh murabbiyi Shuhrat Maqsudov o‘z vazifasidan ozod etilgan, futbolchi Tohir Shamsiddinov esa 1 yil muddatga futboldan chetlatilgan . Turnirdagi Janubiy Koreyaga qarshi o‘yin vaqtida raqibiga ochiqdan-ochiq zarbalar bergan Shamsiddin bunga qadar avvaliga koreyalik futbolchidan , keyin esa hammadan uzr so‘ragandi .
Batafsil | Подробно | Read more... Daryo