O‘zbekiston milliy terma jamoasi Kanadaga qarshi o‘rtoqlik o‘yini o‘tkazadi

Futbol bo‘yicha JCh—2018 3-saralash bosqichidagi raqiblarini bilib olgan O‘zbekiston milliy terma jamoasi 7-iyun kuni Kanadaga qarshi o‘rtoqlik o‘yinida maydonga tushadi. Bu haqda FIFA rasmiy saytining O‘zbekiston futbol federatsiyasiga ajratilgan sahifasida ma’lumot bor .

Foto: Getty Images

Saralashning hal qiluvchi bosqichini 1-sentabr kuni Suriyaga qarshi Toshkentda boshlaydigan O‘zbekiston terma jamoasi Kanadaga qarshi uchrashuvni Avstriyada o‘tkazadi. O‘yin qaysi shaharda bo‘lishiga oydinlik kiritilmagan.
Kanada terma jamoasi 7-aprel kuni e’lon qilingan FIFAning yangi reytingida 95-o‘rinni egallab turibdi. JCh—2018 saralashining KONKAKAF mintaqasida Meksika, Gonduras va Salvador bilan bir guruhdan joy olgan Kanada, 4 ta o‘yinda 4 ochko jamg‘argani holda 3-o‘rinni egallab turibdi.
JCh—2018 saralashining Osiyo mintaqasida O‘zbekistonga raqib bo‘lgan terma jamoalar ham bir qator o‘rtoqlik o‘yinlari borasida kelishuvga erishgan.
Jumladan, Eron 30-may kuni Xorvatiya bilan, 2-iyun kuni Makedoniya bilan maydonga tushadi. Janubiy Koreya va Qatar terma jamoalari ham Yevro—2016 ishtirokchilari bilan o‘yin o‘tkazadi. Koreyaliklar 1-iyun kuni Ispaniya bilan, 5-iyunda esa Chexiya bilan bellashadi. Qatar esa 29-may kuni Albaniya bilan o‘rtoqlik uchrashuvida ishtirok etadi.
3-saralash bosqichidagi O‘zbekiston termasining birinchi raqibi Suriya 31-may kuni Vyetnam bilan o‘yin o‘tkazadi. Faqatgina Xitoy terma jamoasining oldindagi o‘rtoqlik o‘yinlari rejasi ko‘rsatilmagan.


Futbol bo‘yicha O‘zbekiston milliy termasi Tailand Qiroli kubogida qatnashmaydi



Batafsil | Подробно | Read more... Daryo