Krishtianu Ronaldu Rio–2016 Olimpiada o‘yinlarida ishtirok etmasligi ma’lum bo‘ldi

Portugaliya terma jamoasi sardori hamda Madridning “Real” klubi hujumchisi Krishtianu Ronaldu mamlakat terma jamoasi safida Rio–2016 Olimpiada o‘yinlarida ishtirok etmaydi, deb xabar berdi Goal.

Foto: Goal

31 yoshli forvard Portugaliya termasi safida joriy yilning yozida bo‘lib o‘tadigan turnirlardan faqatgina Yevro–2016 da qatnashadi. Mazkur turnir 10-iyundan 10-iyulga qadar Fransiyada o‘tkaziladi.
Portugaliyalik mashhur futbolchi bilan bir qatorda Argentina terma jamoasi va “Barselona” klubi yetakchisi Lionel Messi ham Rio–2016 Olimpiada o‘yinlarida ishtirok etmaydi. Avvalroq Argentina termasi bosh murabbiyi Xerardo Martino bu haqda ma’lum qilgandi .
Messi mamlakat terma jamoasi safida yozda bo‘lib o‘tadigan turnirlardan Amerika Kubogi–2016 da ishtirok etadi. Ushbu turnir 3—26-iyun kunlari AQShda o‘tkaziladi.
Eslatib o‘tamiz, 14-aprel, payshanba kuni Rio–2016 Olimpiada o‘yinlarining futbol turniriga qur’a tashlash marosimi bo‘lib o‘tdi . Portugaliya terma jamoasi Argentina, Jazoir va Gonduras bilan “D” guruhidan joy oldi.
Ma’lumot uchun, Rio–2016 Olimpiadasining futbol turniri 3—20-avgust kunlari bo‘lib o‘tadi. Reglamentga muvofiq, Rio–2016 turnirida 3 nafar 23 yoshdan oshgan, qolganlari esa 23 yoshgacha bo‘lgan futbolchilardan tashkil topgan terma jamoalar qatnashadi.
Batafsil | Подробно | Read more... Daryo