O‘zbekistonlik sportchilar tomonidan Rio–2016 o‘yinlariga qo‘lga kiritilgan yo‘llanmalar soni 65 taga yetdi

16–17-aprel kunlari bo‘lib o‘tgan turli musobaqalarda besh nafar o‘zbekistonlik sportchi Rio–2016 Olimpiada o‘yinlariga yo‘llanma oldi. Bu haqda O‘zbekiston Milliy olimpiya qo‘mitasi matbuot xizmati xabar bermoqda .

Foto: Nikita Rafalovich. MOQ matbuot xizmati

Filippin poytaxti Manila shahrida taekvondoning WTF yo‘nalishi bo‘yicha o‘tkazilagan Osiyo saralash musobaqasida ikki nafar O‘zbekiston vakili Rio–2016 Olimpiadasiga yo‘llanmani qo‘lga kiritdi. Musobaqaning oltin medaliga sazovor bo‘lgan Nikita Rafalovich (-80 kg) Olimpiada litsenziyasini ham  qo‘lga kiritdi . Ayollar o‘rtasidagi bahslarda Nigora Tursunqulova (-67 kg) kumush medalga va eng asosiysi XXXI yozgi Olimpiada o‘yinlarida qatnashish huquqiga ega bo‘ldi.

Nigora Tursunqulova. Foto: MOQ matbuot xizmati

17-aprel, yakshanba kuni Pekin–2008 Olimpiada o‘yinlarining sovrindori Anton Fokin Rio-de-Janeyro shahri (Braziliya)da o‘tkazilayotgan litsenzion musobaqada muvaffaqiyatli ishtirok etib, Rio–2016 Olimpiada o‘yinlarining yo‘llanmasiga ega bo‘ldi.

Foto: MOQ matbuot xizmati

Shuningdek, o‘zbekistonlik stol tennischi Zohid Kenjayev Gonkongda bo‘lib o‘tgan litsenzion turnirda Rio–2016 o‘yinlarining yo‘llanmasini qo‘lga kiritib, stol tennisi bo‘yicha o‘zbekistonlik erkak sportchilar orasida birinchi bo‘lib Olimpiada o‘yinlarida ishtirok etish huquqiga ega bo‘ldi. Ta’kidlash joizki, stol tennisi bo‘yicha o‘zbekistonlik sportchilar so‘nggi bor 2004-yili Afina (Gretsiya)da bo‘lib o‘tgan Olimpiada o‘yinlarida ishtirok etgan edi. O‘shanda O‘zbekiston sharafini Manzura Inoyatova himoya qilgandi.

Foto: Zohid Kenjayev. MOQ matbuot xizmati

Bundan tashqari, sport gimnastikasi bo‘yicha O‘zbekiston sharafini himoya qiluvchi Oksana Chusovitina Rio-de-Janeyro shahri (Braziliya)da o‘tkazilgan Test Event–2016 litsenzion musobaqadasida ishtirok etib, faoliyatidagi yettinchi Olimpiada o‘yinlariga yo‘llanmani qo‘lga kiritdi .

Oksana Chusovitnina. Foto: MOQ matbuot xizmati

Shu tariqa, Rio–2016 o‘yinlariga o‘zbekistonlik sportchilar tomonidan qo‘lga kiritilgan yo‘llanmalar soni 65 taga yetdi. Shulardan 25 tasi paralimpiyachilarga tegishli.
Bugun, 18-aprel kuni Rio-de-Janeyro shahrida Trampolin bo‘yicha litsenzion musobaqalar boshlanadi. Unda o‘zbekistonlik sportchilardan Yekaterina Xilko va Anna Gasparyan ishtirok etadil. Agarda Yekaterina Xilko Rio–2016 o‘yinlariga ham yo‘llanmani qo‘lga kiritsa, bu safargi Olimpiada o‘yinlari uning faoliyatidagi beshinchisi bo‘ladi.

Foto: Yekaterina Xilko. MOQ matbuot xizmati

E’tiborlisi, bugungi kunga kelib dunyo trampolinchilari orasida faqatgina to‘rt nafar sportchi to‘rtta Olimpiada o‘yinlarida qatnashish baxtiga muyassar bo‘lgan. Agarda Yekaterina beshinchi bor Olimpiada o‘yinlari yo‘llanmasini qo‘lga kiritsa, dunyo trampolinchilari orasida 4 yillikning eng nufuzli turnirida ishtirok etish bo‘yicha yakka peshqadamga aylanadi.
Batafsil | Подробно | Read more... Daryo