Video: Toshkentda haydovchi yo‘ldan o‘ta olmayotgan keksa otaxonga yordam berdi

Bunyodkor ko‘chasining “Olmazor” metro bekati yaqinidan o‘tgan qismida yo‘ldan o‘ta olmayotgan keksa otaxonga yordam ko‘rsatgan haydovchi Facebook’dagi “Voditeli Tashkenta” guruhida olqishlandi .

Kadr: Facebook / “Voditeli Tashkenta”

Foydalanuvchi tomonidan e’lon qilingan videoregistrator yozuvida avtomobil Bunyodkor ko‘chasi bo‘ylab harakatlanayotgani, “Olmazor” metro bekatiga yaqin joydagi svetofor ishlamay qolgani va avtomobillari yo‘l bermayotgani sabab, keksa otaxon yo‘ldan o‘ta olmayotganini ko‘rish mumkin.

Video muallifi svetofor ishlamay qolgan piyodalar o‘tish joyi yaqinida to‘xtab, mashinadan tushgan va otaxonni yo‘ldan o‘tkazib qo‘ygan, bu vaqtda boshqa tomondan ham bir yigit yugurib kelib, otaxonga yordam berishga oshiqqan.
Otaxon ikki kishining yordami bilan yo‘ldan o‘tishni boshlaganida ham, qo‘shni bo‘laklardagi avtomobillar harakatni davom ettirgan. Umuman, video muallifi to‘xtab, to otaxon yo‘ldan o‘tib bo‘lgunicha 12 ta avtomobil, xususan, inkassatsiya xizmatining Captiva’si piyodaga yo‘l bermagan.
“Voditeli Tashkenta” guruhi a’zolari video muallifining otaxonga ko‘rsatgan yordamini olqishlagan, bunday ibratli ishlarni har kim har kuni qilishi kerakligi haqida fikrlar bildirib, video muallifiga minnatdorchilik bildirgan. Ayni vaqtda, bu videoxabar faqat maqtanish maqsadida qo‘yilgan, deb fikr bildirganlar ham bor.
Ma’lumot uchun, Yo‘l harakati qoidalariga ko‘ra , svetoforlari ishlamayotgan chorraha — tartibga solinmagan chorraha hisoblanadi. Qoidalarning 110-bandiga muvofiq, tartibga solinmagan piyodalar o‘tish joyi oldida transport vositasi harakatini sekinlashtirsa yoki to‘xtasa, qo‘shni bo‘laklarda harakatlanayotgan boshqa haydovchilar bu transport vositasi oldida piyoda(lar) yo‘qligiga ishonch hosil qilganlaridan so‘nggina harakatlanishni davom ettirishlari mumkin.
Batafsil | Подробно | Read more... Daryo