Sharipova va Umarova Chimkentdagi tennis turnirining chorak finaliga chiqdi

Qozog‘istonning Chimkent shahrida ITF turkumiga kiruvchi, sovrin jamg‘armasi 10 ming AQSh dollaridan iborat Shymkent Open tennis turnirining asosiy to‘r bahslari davom etmoqda. Mazkur musobaqada ishtirok etayotgan o‘zbekistonlik tennischilardan Sabina Sharipova va Komola Umarova chorak finalga chiqdi.

Foto: Getty Images

Xalqaro tennis federatsiyasi rasmiy saytining ma’lum qilishicha , turnirning birinchi raketkasi sifatida qayd etilgan Sabina Sharipova ikkinchi davrada rossiyalik Yekaterina Kazionovaga qarshi bahs yuritdi va 6:1, 6:1 hisobida zafar quchdi.
Saralash bahslari orqali asosiy bosqichga chiqqan Komola Umarova esa ikkinchi davrada gruziyalik Sofia Kvatsabaya bilan kuch sinashdi. 16 yoshli o‘zbekistonlik tennischi dastlabki setni 6:4 hisobida o‘z foydasiga hal qildi. Ikkinchi setda 1:2 hisobida ortda borayotgan gruziyalik tennischi uchrashuvni davom ettira olmasligini ma’lum qildi .
Qayd etish joiz, Sabina Sharipova ilk davrada qozog‘istonlik Arina Taluenkoni ortiqcha qiyinchiliksiz 6:1, 6:1 hisobida, Komola Umarova esa rossiyalik Polina Novikovani 4:6, 6:2, 6:4 hisobida mag‘lubiyatga uchratgan edi.
Shuningdek, o‘zbekistonlik tennischilardan Arina Fols ham musobaqaning ikkinchi davrasida ishtirok etdi. Ammo belaruslik Ilona Kremenga qarshi bahsda 19 yoshli Fols 4:6, 0:6 hisobida yengildi. Ilk davrada O‘zbekiston vakili rossiyalik Nonna Kurginyandan 6:2, 6:4 hisobida ustun kelgandi .
Batafsil | Подробно | Read more... Daryo