“Lokomotiv” OChL guruh bosqichining so‘nggi turini “Bunyodkor” stadionida o‘tkazadi

Futbol bo‘yicha Osiyo Chempionlar Ligasining “A” guruhida peshqadam bo‘lib turgan Toshkentning “Lokomotiv” klubi so‘nggi tur uchrashuvini “Bunyodkor” stadionida o‘tkazadi.

Foto: “Lokomotiv” FK matbuot xizmati

Qayd etish kerak, “temiryo‘lchilar” O‘zbekiston klublari orasida guruh bosqichini muvaffaqiyatli yakunlashga eng yaqin turgan jamoa hisoblanadi. “Lokomotiv” klubi rahbariyatining “Daryo”ga ma’lum qilishicha, BAAning “An-Nasr” klubiga qarshi bellashuv 4-may kuni soat 20:00 da boshlanadi.
OChL reglamentiga ko‘ra, guruhlardagi so‘nggi tur o‘yinlari bir vaqtda boshlanishi kerak. Qolgan besh tur davomida uchrashuvlarni o‘z maydonida o‘tkazayotgan jamoa uning vaqtini o‘zi belgilab keladi. Faqatgina so‘nggi tur o‘yinlari vaqtini Osiyo Futbol Konfederatsiyasi mezbon jamoalar taklifidan kelib chiqib, o‘zi tanlaydi.
“A” guruhining 5-turidan keyin “Lokomotiv” 9 ochko bilan peshqadam bo‘lib turibdi. 4-may kuni Toshkentga tashrif buyuradigan “An-Nasr” 8 ochko bilan 2-pog‘onadan joy olgan. Mazkur jamoalarning Dubayda bo‘lib o‘tgan birinchi o‘yinida 1:1 hisobi qayd etilgandi.
Ma’lumot uchun, so‘nggi turdagi durang natija “Lokomotiv”ni ham, “An-Nasr”ni ham 1/8 final ishtirokchisiga aylantiradi. Hattoki, ehtimoliy mag‘lubiyat “Lokomotiv”ni guruhdan olib chiqishi mumkin. Buning uchun 6 ochko bilan 3-o‘rinda borayotgan Saudiyaning “Al-Ittihod” klubi Ummonda bo‘lib o‘tadigan “Sepahon”ga qarshi o‘yinda ochko yo‘qotishi kerak bo‘ladi.
“Bunyodkor” stadionida o‘zining uy o‘yinlarini o‘tkazadigan “Bunyodkor” klubi esa 6-tur natijasidan qat’i nazar guruh bosqichini muvaffaqiyatsiz yakunlaydi. Sergey Lushchan jamoasi OChLning “Bunyodkor” stadionida kechgan so‘nggi olti o‘yinida raqib darvozasiga gol ura olmagandi.
Batafsil | Подробно | Read more... Daryo