Oliy Liganing dastlabki olti turida kelishilgan o‘yinlar borligi aniqlanmadi

Futbol bo‘yicha 2016-yilgi O‘zbekiston Oliy Ligasining ortda qolgan olti turi davomida kelishilgan yoki shubhali o‘yinlar aniqlanmadi. Bu haqda O‘zbekiston Futbol Federatsiyasi qoshidagi Kelishilgan o‘yinlarni aniqlash bo‘yicha ekspertlar kengashi raisi, halol o‘yin uchun mas’ul ofitser Ahrol Inoyatov “Daryo”ga ma’lum qildi.

Foto: “Championat.asia”

“Hozircha hech narsa sezilgani yo‘q. Men hamma o‘yinlarni ko‘rib chiqishga harakat qilaman. Har turdan ikki yoki uch bellashuvni stadionning o‘zidan tomosha qilaman. Masalan, Toshkent shahridagi o‘yinlar, Olmaliqdagi bellashuvlar bunga misol bo‘la oladi. ‘Buxoro’ hamda ‘Paxtakor’ ishtirokidagi uchrashuvni ham stadionda kuzatdim”, — deb aytib o‘tdi Ahrol Inoyatov.
“Daryo” muxbirining ortda qolgan turlar davomidagi har bir o‘yin birma-bir ko‘rib chiqildimi degan savoliga Ahrol Inoyatov quyidagicha javob qaytardi: “Hammasi ham emas. Hammasiga ulgurmaymiz. Ba’zi birlarini ko‘rib chiqamiz”. Ahrol Inoyatovga ko‘ra, har bir ekspert o‘yinlar haqida o‘z fikrini bildiradi, o‘yinlarning videoyozuvlari ayrim epizodlar bo‘yicha alohida, diqqat bilan o‘rganib chiqiladi.
Qayd etish kerak, 2015-yilgi mavsumning 23-turida bo‘lib o‘tgan “Paxtakor” (Toshkent) — “Metallurg” (Bekobod) uchrashuvining 83-daqiqadan keyingi qismi shubhali va sport prinsiplariga zid ekani aniqlanib, keyinchalik O‘FF “Metallurg” bosh murabbiyi Rustam Mirsodiqovning litsenziyasini qaytarib olgan edi . Bu ekspertlar kengashi tomonidan shubhali ekanligi aniqlangan hozirga qadar yagona o‘yindir.
2016-yilgi mavsumning 6-turi doirasida “Paxtakor” va “Metallurg” 25-aprel kuni o‘zaro maydonga tushdi . 2:1 hisobida Toshkent klubining g‘alabasi bilan nihoyasiga yetgan o‘yinda Kelishilgan o‘yinlarni aniqlash bo‘yicha ekspertlar kengashi vakillari ishtirok etgan.
“Farhod Magometov (PFL bosh direktori), Sardor Rahmatullayev (O‘FF vitse-prezidenti) va men o‘sha kuni o‘yinni stadionning o‘zidan kuzatdik”, — dedi Ahrol Inoyatov. Uning aytishicha, bellashuv murosasiz ruhda o‘tgan.
Batafsil | Подробно | Read more... Daryo