O‘FF rasmiy sayti Iordaniya bilan o‘yin sanasiga aniqlik kiritib, o‘z xabarini to‘g‘rilab qo‘ydi

Futbol bo‘yicha JCh—2018 3-saralash bosqichida ishtirok etadigan O‘zbekiston milliy terma jamoasi Iordaniyaga qarshi o‘rtoqlik uchrashuvini avval xabar qilinganidek 10-iyun kuni emas, 10-noyabr kuni o‘tkazadi.

Foto: O‘FF matbuot xizmati

O‘zbekiston futbol federatsiyasining rasmiy saytiga 28-aprel kuni joylashtirilgan xabarda o‘rtoqlik o‘yini sanasi 10-iyun deb ko‘rsatilgandi.

O‘FF rasmiy saytidan skrinshot (28-aprel)

Bu yangilik bir qator nashrlarda, jumladan, “Daryo”da ham ko‘rinish bergach , O‘FF matbuot xizmati bellashuv sanasini 10-noyabrga o‘zgartirgan.

O‘FF rasmiy saytidan skrinshot (29-aprel)

FIFA rasmiy saytida ham uchrashuv sanasi deb noyabrning o‘ninchi kuni ko‘rsatilgan.

FIFA rasmiy saytidan skrinshot (29-aprel)

Qayd etish kerak, 15-noyabr kuni O‘zbekiston milliy terma jamoasi JCh—2018 3-saralash bosqichining 5-turida Janubiy Koreyaga qarshi safar o‘yinida ishtirok etadi. Iordaniyaga qarshi bellashuv esa katta ehtimol bilan rasmiy o‘yin oldidan tayyorgarlik vazifasini o‘tab beradi.
Ma’lumot uchun, JCh—2014 saralashidan o‘rin olgan Janubiy Koreyaga qarshi safar uchrashuvidan 5 kun oldin O‘zbekiston milliy terma jamoasi Xitoyga qarshi o‘rtoqlik o‘yinida maydonga tushgan. Shu saralashning 2-bosqichidan o‘rin olgan Yaponiyaga qarshi safar o‘yinidan 4 kun oldin esa Janubiy Koreya bilan o‘rtoqlik o‘yinida ishtirok etgan.
Avval xabar qilinganidek, Samvel Babayan murabbiyligidagi O‘zbekiston terma jamoasi 7-iyun kuni Kanadaga qarshi Avstriyada o‘rtoqlik uchrashuvi o‘tkazadi .
Batafsil | Подробно | Read more... Daryo