“Bunyodkor” Toshkent derbisida “Paxtakor”ni yirik hisobda mag‘lub etdi

Futbol bo‘yicha O‘zbekiston Oliy Ligasining 7-turida Toshkentning “Bunyodkor” va “Paxtakor” klublari o‘zaro to‘qnash keldi. “Bunyodkor” stadioni mezbonlik qilgan o‘yinda Sergey Lushchan shogirdlari 3:0 hisobida zafar quchdi va mazkur jamoalar ishtirokidagi Toshkent derbisida birinchi bor yirik hisob qayd etildi.

Foto: “Bunyodkor” FK matbuot xizmati



Oliy Liga, 7-tur. “Lokomotiv” “Olmaliq” klubini yirik hisobda mag‘lub etdi


Uchrashuvning 55-daqiqasiga kelib bosh hakam “paxtakorchilar” darvozasi tomon penalti belgiladi va uni Doston Hamdamov aniq amalga oshirdi. Oradan bir daqiqa o‘tib Zabihillo O‘rinboyev hisobni 2:0 ko‘rinishiga olib keldi. Uchrashuvning asosiy vaqti yakuniga uch daqiqa qolganida esa Eldor Shomurodov “Paxtakor” darvozasiga uchinchi golni kiritdi.
Qayd etish kerak, bellashuvda o‘z hisobiga gol yozib qo‘ygan uch nafar futbolchi 2015-yil yakunlariga ko‘ra Osiyo qit’asining eng yaxshi yosh o‘yinchisi bo‘lish uchun da’vogarlik qilgandi.
7-turga qadar “Paxtakor” 3 ta bellashuvda zafar quchgan va yana shunchasida durang o‘ynagandi. “Bunyodkor” stadionida No‘mon Hasanov jamoasi mavsumdagi birinchi mag‘lubiyatni qabul qilib oldi.
Mazkur g‘alabasidan keyin “Bunyodkor” ochkolari sonini 19 taga yetkazib, “Lokomotiv” va “Nasaf” bilan tenglashib oldi. To‘plar nisbatiga ko‘ra “qaldirg‘ochlar” “Lokomotiv”dan keyin ikkinchi bo‘lib turibdi.


Oliy Liga, 7-tur. “Lokomotiv”dan keyin “Nasaf” ham yirik hisobda zafar quchdi


O‘zbekiston Oliy Ligasi
7-tur bellashuvi
29 aprel, juma
“Bunyodkor” — “Paxtakor” 3:0
Gollar: Doston Hamdamov, 56-pen (1:0). Zabihillo O‘rinboyev, 57 (2:0). Eldor Shomurodov, 87 (3:0).
Batafsil | Подробно | Read more... Daryo