O‘zbekistonlik kurashchi Ixtiyor Navro‘zov AQShdagi JChda kumush medalini qo‘lga kiritdi

AQShning Las-Vegas shahrida o‘tkazilayotgan jahon chempionatida yana bir o‘zbekistonlik sportchi kumush medal sovrindori bo‘ldi, deb xabar qiladi O‘zbekiston Milliy olimpiya qo‘mitasi matbuot xizmati.

Foto: wrestling.uz

Erkin kurash bo‘yicha vazni 65 kilogrammgacha bo‘lgan polvonlar bahsida O‘zbekiston sharafini munosib himoya qilayotgan Ixtiyor Navro‘zov 1/16 finalda Namibiya, 1/8 finalda Ukraina, chorak finalda Mo‘g‘uliston, yarim final bellashuvida esa 2014-yilgi Jahon chempioni Soslan Ramonovni mag‘lub etib, finalga chiqdi. Hal qiluvchi bahsda italiyalik Frenk Chamizo Markes bilan bahs yuritgan Navro‘zov 3:4 hisobida imkoniyatni boy berdi.
Eslatib o‘tamiz, mazkur jahon chempionatining yunon-rum kurashi bo‘yicha 85 kilogrammgacha bo‘lgan polvonlar bellashuvida o‘zbekistonlik Rustam Assakalov ham kumush medali bilan taqdirlangan edi .
Rustam Assakalov va Ixtiyor Navro‘zov 2016-yili Rio-de-Janeyro shahri (Braziliya)da o‘tkaziladigan Olimpiada o‘yinlari yo‘llanmasini qo‘lga kiritdi.
Batafsil | Подробно | Read more... Daryo