O‘zbekiston U-19 termasi Saudiya Arabistoniga ikkinchi o‘rtoqlik o‘yinida ham mag‘lub bo‘ldi

2016-yilning 13—30-oktabr kunlari Bahraynda 19 yoshgacha bo‘lgan futbolchilar o‘rtasida bo‘lib o‘tadigan Osiyo chempionatiga tayyorgarlik ko‘rayotgan Jasur Abduraimov boshchiligidagi O‘zbekiston yoshlar terma jamoasi Saudiya Arabistonining Al-Xobar shahrida o‘tkazilayotgan yig‘in doirasida Saudiya Arabistoniga qarshi ikkinchi o‘rtoqlik o‘yinida maydonga tushdi. Bu haqda O‘zbekiston futbol federatsiyasi matbuot xizmati xabar bermoqda .

Foto: O‘FF matbuot xizmati

30-aprel, shanba kuni bo‘lib o‘tgan uchrashuvda Saudiya Arabistoni yoshlar terma jamoasi 3:2 hisobida g‘alaba qozondi.
O‘yinda hisobni o‘zbekistonlik yoshlar ochdi. 6-daqiqada Oybek Rustamov aniq zarbasi bilan raqib darvozasini ishg‘ol qildi. Oradan 5 daqiqa o‘tib, hisob tenglashtirildi. Birinchi bo‘lim yakuniga qadar tomonlar yana bittadan gol urishga muvaffaq bo‘ldi. 40-daqiqada Umid Ergashev qo‘riqlayotgan darvoza tomon 11 metrlik jarima zarbasi belgilandi va u aniq amalga oshirildi. 42-daqiqada esa Aziz G‘aniyev jarima to‘pini qoyilmaqom bajarib, hisobni tenglashtirdi – 2:2.
Uchrashuv asosiy vaqtiga qo‘shib berilgan daqiqalarda Jasur Abduraimov shogirdlari raqib qarshi hujumini o‘tkazib yubordi va saudiyaliklar bu hujumni gol bilan yakunladi – 3:2.
Eslatib o‘tamiz, 28-aprel kuni bo‘lib o‘tgan dastlabki o‘yinda ham 3:2 hisobi qayd etilgan va Saudiya Arabistoni yoshlar terma jamoasi g‘olib bo‘lgandi .
Qayd etish joiz, 30-aprel, shanba kuni Bahrayn poytaxti Manama shahrida yoshlar o‘rtasidagi Osiyo chempionati U-19 final bosqichiga qur’a tashlash marosimi bo‘lib o‘tdi . Unga ko‘ra, O‘zbekiston yoshlar termasi “D” guruhidan joy oldi. Jasur Abduraimov boshchiligidagi jamoaga guruhda Xitoy, Avstraliya hamda Tojikiston yoshlar terma jamoalari qarshi bahs olib boradi .
O‘rtoqlik uchrashuvi
30.04.2016, Al-Xobar
Saudiya Arabistoni U-19 – O‘zbekiston U-19 3:2
O‘zbekiston gollari: Oybek Rustamov (6), Aziz G‘aniyev (42)
O‘zbekiston U-19: Umid Ergashev, Oybek Rustamov, Islom Qobilov, Husniddin G‘ofurov, Xojiakbar Alijonov, Aziz G‘aniyev, Nurillo To‘xtasinov, Sharof Muhiddinov, Sanjar Qodirqulov, Ilhom Alijonov, Bobir Abduxoliqov.
Zaxira: Umid Hamroyev, Behzod G‘anijonov, Mirjahon Mirahmadov, Islom Kenjaboyev, Abduqodir Ortiqov, Tursunboy Rahimberdiyev, Usmonali Usmonaliyev, Jasur Yaxshiboyev, Bilol Toshmirzayev, Suxrob Nurilloyev.
Batafsil | Подробно | Read more... Daryo