APL. “Lester” muddatidan avval chempion bo‘lish masalasini “Yunayted” bilan o‘yinda hal eta olmadi

Futbol bo‘yicha Angliya Premyer-ligasi 36-turining markaziy o‘yinida “Manchester Yunayted” hamda “Lester” klublari o‘zaro to‘qnash keldi. 1:1 hisobi bilan yakuniga yetgan o‘yindan so‘ng “Lester” muddatidan avval chempion bo‘lib olish masalasini o‘zi hal eta olmadi.

Foto: Sport-express

Uchrashuvning 8-daqiqasiga kelib mezbonlar hisobda oldinga chiqib olgan bo‘lsa, oradan yana sakkiz daqiqa o‘tib Klaudio Ranyeri jamoasi muvozanatni tikladi. Qolgan daqiqalarda gol urish hech bir futbolchiga nasib qilmadi.
36-turdan keyin “Lester” 77 ochko bilan peshqadam bo‘lib turibdi. 2-o‘rinda borayotgan “Tottenhem” hisobida 69 ochko bor. London klubi o‘z hisobidagi uchta o‘yinda zafar quchsa va “Lester” kelasi ikki turda mag‘lub bo‘lsa, u holda chempionlik “Tottenhem”ga nasib etadi.
Shuningdek, 36-turda “Tottenhem” mag‘lub bo‘lsa, “Lester” o‘z-o‘zidan 36-turdan keyinoq mamlakat chempioniga aylanadi. Ma’lumot uchun, “Tottenhem” 36-turni 2-may kuni “Chelsi”ga qarshi o‘tkazadi. G‘alabadan boshqa har qanday natija “Tottenhem”ni chempionlikdan ayiradi.
“MYu” esa ochkolari sonini 60 taga yetkazib olgani holda, 5-o‘rindan joy olgan. “Arsenal” hisobida 67, “Manchester Siti”da 64 ochko borligi inobatga olinsa, “Yunayted” katta ehtimol bilan Chempionlar Ligasidan chetda qolishi mumkin.


Lui Van Gal: Kelasi mavsumda ham “Manchester Yunayted”ni boshqaraman


Angliya Premer-ligasi
36-tur bellashuvi
1-may, yakshanba
“Manchester Yunayted” — “Lester” 1:1
Gollar: Antoni Marsyal, 8 (1:0). Ues Morgan, 17 (1:1).
Chetlatish: Deniyel Drinkuoter, 86 (L).
“Manchester Yunayted”: David De Xea, Markos Roxo, Kris Smolling, Deyli Blind, Antonio Valensiya, Maruan Fellayni (Ander Errera, 75), Jessi Lingard (Xuan Mata, 62), Maykl Kerrik, Markus Rashford (Memfis Depay, 82), Ueyn Runi, Antoni Marsyal.
“Lester”: Kasper Shmeyxel, Denni Simpson, Kristian Fuks, Ues Morgan, Robert Xut, Jeffri Shlupp (Mark Olbrayton, 77), N’Golo Kante, Deniyel Drinkuoter, Riyod Mahrez (Endi King, 88), Leonardo Ulyoa, Sindzi Okazaki (Demaray Grey, 67).
Batafsil | Подробно | Read more... Daryo