Venesuela prezidenti jinoiy guruhlarga rasmiylarga taslim bo‘lish va qurolni topshirish uchun 3 sutka vaqt berdi

Venesuela prezidenti Nikolas Maduro 10-may, seshanba kuni mamlakatdagi jinoiy guruhlarga rasmiylarga taslim bo‘lish va tinch yo‘l bilan qurolni topshirish uchun uch sutka vaqt berdi. Aks holda ular kuch vositasida yo‘q qilinishi bildirilgan, deya xabar beradi “RIA Novosti”.

Foto: “RIA Novosti”

“Kelishuvga erishishni istagan guruhlarda buning uchun 72 soat bor. Ularning faoliyatiga uzil-kesil chek qo‘yish vaqti keldi, farzandlarimiz tinch hayot kechirishga loyiq”, — deya ta’kidlagan Maduro.

Hozirda Venesuela, jumladan, poytaxt Karakasda jinoyatchilik darajasi rekord darajaga yetgan. Observatorio Venezolano de Violencia mustaqil tashkiloti ma’lumotlariga ko‘ra, 2015-yilni mamlakat har 100 ming kishiga 90 ta qotillik ko‘rsatkich bilan yakunlagan. Bu esa urush harakatlari olib bormayotgan mamlakat uchun eng yuqori ko‘rsatkich hisoblanadi.

Maduro taslim bo‘lishdan bosh tortgan jinoyatchilarga qarshi qurolli kuchlar, milliy politsiya, maxsus jinoiy qidiruv va xavfsizlik xizmatlarini safarbar etishni va’da qildi. 10-may kuni Karakasda “Xalqni ozod etish va himoya qilish operatsiyasi”ning navbatdagi bosqichi boshlandi va uning natijasida qarshilik ko‘rsatgan to‘qqiz nafar jinoyatchi o‘ldirildi. 



Batafsil | Подробно | Read more... Daryo