Xitoyning eng baland osmono‘par binosidan tushgan oyna Tesla haydovchisini yaraladi

9-may, dushanba kuni Xitoydagi eng baland osmono‘par bino — Shanxay minorasining 76-qavatidan oyna pastga qulab tushdi. Bu haqda TJournal xabar bermoqda . 

Foto: TJournal

Hodisa bino tomosha qiluvchilar uchun ochilganidan atigi bir necha hafta o‘tib sodir bo‘ldi. 200 kilogramm atrofidagi oyna avtoturargohga qo‘yilgan Tesla avtomobili yoniga kelib tushdi. Zarba chog‘ida haydovchi mashinadan chiqayotgan bo‘lgan. Oyna erkakning yoniga kelib tushgani sababli u omon qoldi, biroq oyog‘iga ko‘plab shisha siniqlari kirib, jarohat olgani uchun kasalxonaga jo‘natildi. Avtomobil shikastlangan yoki yo‘qligi ma’lum emas, lekin suratlarda atrofida ko‘plab shisha bo‘laklarini ko‘rish mumkin. 

Foto: TJournal

Mahalliy OAV manbalariga ko‘ra, hodisa shikastlangan oyna ishchilar tomonidan almashtirilayotganda ro‘y bergan. Shanxay minorasi vakillarining bildirishicha, oyna mustahkam bo‘lgan, shu bois bu holat qanday sodir bo‘lgani hozirgacha tushunarsiz bo‘lib turibdi. Binodagi barcha shu kabi ishlar tekshiruv yakunlanguncha to‘xtatildi. 
Ma’lumot uchun, Shanxay minorasi sakkiz yil davomida qurilgan va joriy yil martida yerto‘la va pastki qavatlari ochilgandi. Uning balandligi 632 metr bo‘lib, ushbu ko‘rsatkich bo‘yicha faqat Dubaydagi “Burj Xalifa”dan (828 metr) ortda qoladi. 
Batafsil | Подробно | Read more... Daryo