Kanadalik bola mayyalarning yo‘qolgan shahrini topgani haqidagi xabar yolg‘on bo‘lishi mumkin

Dunyoning yirik OAVlari kosmik suratlar orqali mayyalarning yo‘qolgan shahrini topishga muvaffaq bo‘lgan kanadalik o‘smir bola haqida xabar tarqatdi. Yigitcha rasmiy tabriklarni qabul qilmoqda, sanoqsiz intervyular bermoqda va changalzorga ekspeditsiyaga jo‘nash uchun mablag‘ yig‘moqda. Kosmik ekspert Vitaliy Yegorov esa ushbu yangilikni ipidan ignasigacha tahlil qilib chiqdi va uning soxta ekanligini aniqladi, deb yozadi “Populyarnaya Mexanika”.

Foto: “Populyarnaya Mexanika”

Avvalroq Kanadaning Kvebek provinsiyasida yashovchi 15 yoshli Uilyam Gaduri Yukatan (Markaziy Amerikadagi yarim orol) changalzorlarida yo‘qolib ketgan mayyalar shahrini qidirib topgani xabar berilgan edi .
O‘quvchining so‘zlariga ko‘ra, unga qidiruv ishlarida Nyu-Brunsvik universiteti mutaxassislari yordam bergan, qo‘shimcha suratlarni Kanada va Yaponiya kosmik agentliklari taqdim etgan.

Foto: “Populyarnaya Mexanika”

Uilyam mayyalar shahrini Yukatan xaritasi ustiga 23 ta yulduz turkumi xaritasini joylashtirish orqali topganini aytmoqda. Yulduz turkumlaridagi 142 ta yulduzdan 117 tasi mayyalar shaharlariga mos tushgan. Bitta joyda o‘zgacha yorqin yulduz Yerdagi muvofiqligini topmagan. Shunda u sun’iy yo‘ldoshdan olingan suratlardan foydalanib, yo‘qolgan shahar alomatlarini aniqladi. Uning aytishicha, 86 metrli piramida, 30 dan ortiq qo‘lda ishlangan tuzilmalar aniqlangan. U hatto shaharning taxminiy maydonini 80 dan 120 kvadrat kilometrgacha deya baholagan, bu uni mayyalar sivilizatsiyasida kattaligi bo‘yicha to‘rtinchi o‘ringa chiqaradi.

Foto: “Populyarnaya Mexanika”

Nashr, avvalo, Uilyamning taqdimotidan atigi bitta dona slaydni chop etgan le Journal de Montreal jurnalining pozitsiyasidan taajjubga tushdi.
Ikkinchidan, yulduz turkumlarining Yerdagi manzilgohlarga mos tushishi qadimiy mayyalarda benuqson geodeziya xizmati bo‘lgani, u Yukatan xaritasini yuqori aniqlikda tuzib, so‘ng unda sivilizatsiyaning barcha shaharlari qurilishi rejalashtirilganini nazarda tutadi. Bu shunchaki tasodif ekanligi ehtimolga yaqinroqdir.
Uchinchidan, “shahar”ning ko‘rsatilgan xarobalarini Google Maps’da topib, uni qadimiy mayya shaharlarining haqiqiy xarobalari bilan solishtirganda, qalin o‘rmon qatlami orasidan inson qo‘li bilan yaratilgan hech narsani aniqlab bo‘lmasligini ko‘rish mumkin. Ya’ni 30 ta tuzilma u yerda bo‘lgan taqdirda ham, ularni topish amri mahol bo‘lar edi.
To‘rtinchidan, keltirilgan suratlarda, haqiqatan ham yaqqol antropogen tuzilmalarni ko‘rish mumkin: hozircha tabiat o‘rmonlarni to‘rtburchak shaklda kesishni o‘rganganicha yo‘q.

Foto: “Populyarnaya Mexanika”

Aynan shu maydonni bola piramida qoldig‘i deb o‘ylagan bo‘lishi mumkin. Le Journal de Montreal jurnalistlari uning gipotezasini qo‘llab-quvvatlab, 100 km masofada hech qanday zamonaviy shahar yo‘qligini ta’kidladi. Ammo oddiy qishloqlar u yerdan 15 km narida ham topiladi va ularning barchasi xuddi shu kabi antropogen to‘rtburchaklar bilan qoplangan — bular daraxtlari kesilgan oddiy maydonlardir.

Foto: “Populyarnaya Mexanika”

Beshinchidan, ushbu yangilikka kosmik syomka bo‘yicha mutaxassislardan tashqari hech kim, shu mintaqa va shu davrga ixtisoslashgan professional arxeologlar ham fikr bildirganicha yo‘q.
Avvalroq xabar berilganidek, o‘quvchi bolaning topilmasi rost-yolg‘onligini tekshirib ko‘rish imkoni tug‘ilganicha yo‘q — mayyalar shahri Yukatan changalzorlaridagi deyarli o‘tib bo‘lmaydigan nuqtalarda joylashgan.
Batafsil | Подробно | Read more... Daryo