Eron Ar-Riyod bilan nizo tufayli ziyoratchilarni hajga yubora olmaydi

Eron madaniyat vaziri Ali Jannatiy 12-may, payshanba kuni eronlik ziyoratchilar bu yil Saudiya Arabistoniga haj safari uyushtira olmasligi mumkinligini ma’lum qildi, deb yozadi “Interfaks”.

Foto: “Panoramio.com”

Vazirning bayonoti Tehron va Ar-Riyodning eronlik ziyoratchi shialarga vizalar taqdim etish haqidagi muvaffaqiyatsiz muzokaralaridan so‘ng yangradi.
“Biz qo‘limizdan kelganini qildik, ammo saudiyaliklar muzokaralarga to‘sqinlik qildi. Endi vaqt yo‘qotildi”, — deya ta’kidladi vazir.
Jannatiyning so‘zlariga ko‘ra, avvalroq Saudiya Arabistoni hukumati Ar-Riyod va Tehron o‘rtasida diplomatik aloqalar mavjud bo‘lmagan bir sharoitda eronlik ziyoratchilar viza olish uchun qirollikning boshqa mamlakatlardagi elchixonalariga murojaat qilishi kerakligini aytgan edi.
Uning qo‘shimcha qilishicha, Saudiya Arabistoni, shuningdek, Eronning eronlik ziyoratchilarni havo yo‘li bilan tashishni tashkillashtirish va ularning xavfsizligini ta’minlash borasidagi takliflarini rad etgan.
Eslatib o‘tamiz, 2-yanvar kuni Saudiya Arabistoni tashqi ishlar vazirligi terrorizm va fitna uchun sudlangan 47 kishiga nisbatan o‘lim hukmi ijro etilganini e’lon qildi . Saudiya hukumati shialar xatibi Nimr an-Nimrni qatl qilgani ma’lum bo‘lganidan so‘ng, Tehronda namoyishchilar Saudiya Arabistoni elchixonasiga  bostirib kirdi . Shundan keyin Saudiya Arabistoni Eron bilan diplomatik aloqalar uzilganini  e’lon qildi .
Batafsil | Подробно | Read more... Daryo