Milliy universitet qaytadan tashkil etiladi

O‘zbekiston Respublikasi Prezidenti Islom Karimov 11-may kuni O‘zbekiston Milliy universiteti faoliyatini yanada takomillashtirish chora-tadbirlari to‘g‘risida qaror ( pdf ) imzoladi, deya xabar bermoqda “Gazeta.uz”.

O‘zbekiston Milliy universiteti. Foto: UZ24

Milliy universitet oliy ta’lim rivojining jahon tajribasini hisobga olgan holda yuqori malakali mutaxassislar tayyorlash darajasi va sifatini tubdan oshirish, universitet ilmiy salohiyatini yanada mustahkamlash, o‘quv jarayonining ilmiy-tadqiqot faoliyati bilan uzviy aloqasini kuchaytirish, professor-o‘qituvchilar va talabalarni fundamental va amaliy tadqiqotlar o‘tkazishga keng jalb etish, shuningdek, buning uchun zarur zamonaviy infratuzilma va moddiy-texnika bazasini yaratish maqsadida qayta tashkil qilinadi.
Hujjatda O‘zMUning yangilangan tashkiliy tuzilmasi belgilab qo‘yilgan, unga ko‘ra, OTMda geologiya va geografiya, fizika, biologiya, kimyo, matematika, xorijiy filologiya, tarix, iqtisodiyot, ijtimoiy fanlar va jurnalistika fakulteti faoliyat olib boradi.
Qarorda belgilanishicha, Milliy universitet respublikaning matematika, tabiiy-ilmiy va gumanitar yo‘nalishlari bo‘yicha oliy ma’lumotli kadrlar tayyorlash sohasidagi tayanch oliy ta’lim muassasasi hisoblanadi.
Shuningdek, hujjatga muvofiq, Fanlar akademiyasining Yadro fizikasi instituti tugatiladi va uning binolariga Milliy universitet fizika fakultetining mutaxassislik kafedralari, laboratoriyalari, magistratura va doktorantura bo‘limlari joylashtiriladi.
Batafsil | Подробно | Read more... Daryo