Rossiya sudi Apple Watch’ni oddiy qo‘l soati deb tan oldi

Moskva hakamlik sudi 17-may kuni AQShning Apple korporatsiyasi Rossiya bo‘linmasi — “Eppl Rus” MJChning Federal bojxona xizmati ustidan shikoyatini asossiz deb topdi. Bu haqda “RBK” xabar bermoqda .

Foto: Getty Images

Kompaniya bojxonachilarning Apple Watch soatlari bojxona tasnifini o‘zgartirish bo‘yicha uchta qarorini noqonuniy deb tan olishni so‘ragan edi. Bojxona xizmati Yevrosiyo iqtisodiy ittifoqi tashqi iqtisodiy faoliyat tovar nomenklaturasi bo‘yicha Apple Watch’ni oddiy qo‘l soati deb topgandi. Qo‘l soatlarini olib kirish bo‘yicha boj 10 foizga yetadi, ma’lumot uzatish uskunalari esa bojga tortilmaydi.
Federal bojxona xizmati innovatsion uskunani oddiy soat sifatida tasniflaganiga sabab uning asosiy komponentlaridan biri vaqt hisoblash unsuridir, u esa soat mexanizmi shaklida bo‘lishi shart emas, deb tushuntirdi sud eshituvlarida bojxona xizmati vakili. Apple vakili, o‘z navbatida, uskuna ko‘p funksiyali ekanligini va soat uning asosiy komponenti emasligini uqtirdi.
Eshituvlar yakunlariga ko‘ra sud bojxona tarafining dalillarini asosli deb topdi. Qarorning asl motivlari sud aktining to‘liq matni chop etilganidan so‘ng ma’lum bo‘ladi.
Qaror bir oydan so‘ng kuchga kiradi.
Batafsil | Подробно | Read more... Daryo