A320 halokati joyida tana qoldiqlari topildi

Misr qutqaruvchilari EgyptAir aviakompaniyasi tegishli A320 layneri halokatga uchragan yerdan yuk, o‘rindiq va tana qoldiqlarini topdi. Bu haqda, Reuters’ga asoslanib, “RBK” xabar bermoqda .

A320 radarlardan g‘oyib bo‘lgan hududda qidiruv operatsiyasi. Kadr: Misr mudofaa vazirligi

“Bir muddat ilgari Misr rasmiylari bizni samolyot signali g‘oyib bo‘lgan joydan janubda tana qoldiqlari, o‘rindiq va yuk topilganidan boxabar qildi”, — dedi Gretsiya mudofaa vaziri Panos Kammenos.
Ilgariroq Misr harbiylari Iskandariyadan 290 kilometr shimolda yo‘qolgan A320 layneri bo‘laklarini topgani ma’lum qilingan edi .
AQSh razvedkasi halokatning asosiy sababi sifatida teraktni ko‘rayotgani xabar qilingan edi . Bundan tashqari, Misr fuqarolik aviatsiyasi vaziri Sharif Fathiy terrorchilik hujumi aqlga kelayotgan birinchi ehtimol ekanligini tan olgandi.
Parijdan Qohiraga uchayotgan samolyot Gretsiya havo hududiga kirgandan 20 daqiqa o‘tib, radarlardan g‘oyib bo‘ldi. MS804 reysi bortida 56 nafar yo‘lovchi (ulardan uch nafari bola) va o‘n nafar ekipaj a’zosi bor edi. Ularning taqdiri hozircha noma’lum.
“Mayadin” telekanali, EgyptAir aviakompaniyasidagi manbasiga tayanib, samolyot O‘rta Yer dengiziga qulaganini bildirgandi .
Misr fuqarolik aviatsiyasi vazirligi EgyptAir kompaniyasining A320 samolyoti halokatga uchraganini rasman tasdiqladi .
Batafsil | Подробно | Read more... Daryo