Davlat raqobat qo‘mitasida Yaponiyaning “Nomura” tadqiqot instituti vakillari bilan uchrashuv bo‘lib o‘tdi

O‘zbekiston Respublikasi xususiylashtirish, monopoliyadan chiqarish va raqobatni rivojlantirish davlat qo‘mitasida Yaponiyaning “Nomura” tadqiqot instituti vakillari bilan uchrashuv bo‘lib o‘tdi. Bu haqda qo‘mita matbuot xizmati xabar bermoqda .

Foto: Nomura Research Institute

Qo‘mita raisi Davron Hidoyatov ishtirokidagi uchrashuvda JICA (Yaponiya xalqaro hamkorlik agentligi) so‘roviga ko‘ra o‘tkazilayotgan tadqiqotlar doirasida O‘zbekistonda infrastrukturaviy rivojlanish masalalari muhokama qilindi.
“Nomura” vakillari O‘zbekistonda davlat aktivlarini xususiylashtirishga investitsiya kiritish istagidagi yapon kompaniyalariga ko‘mak berish, bu borada qo‘mita bilan faol hamkorlik qilish istagini bildirdi. O‘z navbatida, qo‘mita rahbariyati institut bilan mamlakatdagi xususiylashtirilayotgan obyektlarga yapon kompaniyalari investitsiyalarini jalb etishda hamkorlikka tayyor ekanligini ta’kidlab o‘tdi. Tomonlar uchrashuvda ko‘tarilgan masalalar yuzasidan kelgusida doimiy muloqotda bo‘lish haqida kelishib oldi.
Ma’lumot uchun, “Nomura” 50 yildan ortiq vaqtdan beri hukumat idoralari va xususiy buyurtmachilarga xizmat ko‘rsatib kelayotgan Yaponiyadagi yirik xususiy konsalting kompaniyasi bo‘lib, mamlakatdan tashqari, AQSh, Rossiya, Xitoy va boshqa davlatlardagi 20 dan oshiq filiallarda faoliyat ko‘rsatadigan 8 mingdan ziyod xodimga ega.
Batafsil | Подробно | Read more... Daryo