Buyuk Britaniya bosh vaziri Devid Kemeron Turkiyaning 3000-yilda Yevropa Ittifoqiga qo‘shilishini aytdi

Buyuk Britaniya bosh vaziri Devid Kemeron Turkiya Yevropa Ittifoqiga 3000-yildan avval a’zo bo‘la olmasligini aytib o‘tdi. Bu haqda Meduza xabar bermoqda .

Foto: EPA

“Ular Yevropa Ittifoqiga a’zo bo‘lish uchun 1987-yilda ariza bergan. Agar voqealar hozirgi tezlikda rivojlanadigan bo‘lsa, so‘nggi taxminlarga ko‘ra, ular 3000-yil arafasida Ittifoqqa kirishi mumkin”, — dedi Kemeron Peston on Sunday ko‘rsatuvida.
Kemeronning aytishicha, Yevropa Ittifoqiga yangi davlatlar qo‘shilishi masalasida Buyuk Britaniya veto huquqiga ega. Avvalroq mamlakat mudofaa vaziri Penni Mordont Buyuk Britaniya Turkiyaning Yevroittifoqqa qo‘shilishiga qarshilik qila olmasligini aytib, bo‘lajak referendumda britaniyaliklarni Yevroittifoqdan ajralib chiqish uchun ovoz berishga chaqirgan edi.
Buyuk Britaniyaning Yevropa Ittifoqi tarkibidan chiqishiga qaratilgan targ‘ibot kampaniyasi vakili Maykl Gouv Turkiyaning Yevroittifoqqa ehtimoliy qo‘shilishini Buyuk Britaniya uchun tahdid deb atagan, tahdidga asos sifatida Turkiyada tug‘ilish va jinoyatchilik darajasi yuqori ekanligini ko‘rsatgan.
Buyuk Britaniyada 23-iyun kuni mamlakatning Yevropa Ittifoqidan ajralib chiqishi masalasida referendum bo‘lib o‘tadi. Bosh vazir Devid Kemeron mamlakatning ittifoq tarkibida qolishi uchun ovoz berishga chaqirmoqda. Fevral oyida u Yevroittifoqning boshqa mamlakatlari rahbarlari bilan Buyuk Britaniyaning alohida maqomi borasida kelishib olgan edi.
Turkiya NATO a’zosi hisoblanadi va 1996-yildan beri Yevropa Ittifoqi bilan bojxona ittifoqiga kiradi. Mamlakat Yevropa Ittifoqiga kirish uchun 1987-yili ariza bergan, 1999-yili nomzod maqomini olgan.
2016-yili Yevropa Ittifoqi va Turkiya Gretsiya hududiga Turkiya orqali kirib kelgan noqonuniy muhojirlarni ortga qaytarish borasida kelishib olgan edi. Buning evaziga Yevroittifoq Turkiya fuqarolari uchun viza tartibini yengillashtirish va mamlakatning Ittifoqqa qo‘shilishi jarayonini tezlashtirishga va’da bergan.
Batafsil | Подробно | Read more... Daryo