Hindistonlik erkak 60 sekundda 79 kishini quchoqlab, Ginnes rekordlar kitobiga kirdi (video)

Hindistonning Haydarobod shahrida istiqomat qiluvchi erkak bir daqiqa ichida 79 kishini quchoqlab, yangi jahon rekordini o‘rnatdi. Bu haqda “RIA Novosti” xabar bermoqda .

Kadr: YouTube

Rekord Andxra-Pradesh shtatidagi maktablardan birida qayd etildi. 88 nafar maktab o‘quvchisi qatorlashib turdi, ishora berilganidan so‘ng ular bo‘lajak rekordchi Krishna Kumarga navbatma-navbat yaqinlasha boshladi.
Kumar 83 o‘quvchini quchoqlashga ulgurdi. Ammo Ginnes rekordlar kitobida 79 nafari qayd qilindi, negaki, kitob vakillarining fikricha, qolgan holatlar quchoqlashishdan ko‘ra kurash harakatiga o‘xshab ketgan.
Rekord 5-may kuni o‘rnatilgan bo‘lsa ham, u haqda rekordlar kitobi rasman 24-may kuni xabar qildi.
Ilgarigi rekord avstraliyalik teleboshlovchi Kerri Bikmorga tegishli edi — u 2014-yilda Avstraliyadagi bolalar shifoxonasida bir daqiqada 77 kishini quchoqlagan edi.




Batafsil | Подробно | Read more... Daryo