OAV: Povetkinning “B” doping namunasida meldoniy borligi aniqlandi

Superog‘ir vazndagi rossiyalik bokschi Aleksandr Povetkinning meldoniyga topshirgan “B” doping namunasi ijobiy natija berdi. Bu haqda ESPN nashriga tayanib, “TASS” xabar bermoqda .

Foto: “TASS”



Rossiyalik bokschi Povetkinning doping tekshiruvida meldoniy qoldiqlari aniqlandi


Avvalroq rossiyalik bokschining doping-testida 70 nanogramm meldoniy topilgani uchun  uning Butunjahon boks kengashi (WBC) versiyasi bo‘yicha jahon chempioni, amerikalik Deontey Uaylderga qarshi 21-may kuni bo‘lib o‘tadigan jangi noma’lum muddatga qoldirilgani ma’lum qilingandi .
Keyinroq ESPN telekanali, Povetkinning 27-aprel kuni topshirgan doping-testi ijobiy chiqqani, uning 7, 8 va 11-aprel kunlari topshirgan doping-testi esa salbiy natija ko‘rsatganini ma’lum qilib, rossiyalik bokschi 11–27-aprel oralig‘ida meldoniy qabul qilgan, degan xulosaga kelgandi.


Butunjahon boks kengashi Povetkin – Uaylder jangini noma’lum muddatga qoldirdi


Uaylder vakillari jang bekor qilingani uchun 4,6 million dollar tovon puli talab qilishini ma’lum qilgan. Keyinroq WBC Uaylder – Povetkin jangi qoldirilgani uchun amerikalik bokschi ixtiyoriy himoya jangini o‘tkazishi kerakligini ta’kidlagan.
Aleksandr Povetkin WBC chempionlik kamariga majburiy da’vogar sanaladi. U tashkilotning superog‘ir vazn toifasi reytingida birinchi o‘rinni egallab turibdi. 2004-yili Afinada o‘tkazilgan Olimpiada chempioni bo‘lgan 36 yoshli rossiyalik bokschi professional ringda 31 jang o‘tkazib, 30 ta g‘alabaga (shulardan 22 tasi nokaut bilan) erishgan va bir marta mag‘lubiyatga uchragan. 30 yoshli Uaylder 2015-yilda WBC chempioniga aylangan. 2008-yili Pekinda bo‘lib o‘tgan Olimpiadaning bronza medali sohibi professional ringda 36 ta jangning barchasida (35 tasida nokaut bilan) zafar quchgan.
Batafsil | Подробно | Read more... Daryo