Tailandning Pattaya shahrida ilk bora kurash bo‘yicha xalqaro turnir o‘tkazilmoqda

Tailand qirolligining Pattaya shahrida ilk bora kurash bo‘yicha Tailand & Pattaya xalqaro turniri bo‘lib o‘tmoqda. Bu haqda Xalqaro kurash assotsiatsiyasi matbuot xizmati “Daryo”ga xabar berdi.

Foto: Xalqaro kurash assotsiatsiyasi matbuot xizmati

Tailand kurash federatsiyasi va Tailand Milliy olimpiya qo‘mitasi tashabbusi bilan 28–30-may kunlari o‘tkazilayotgan mazkur turnirda Tailandning 15 ta hududidan 100 nafardan ortiq kurashchi ishtirok etmoqda.
“Tailand kurash federatsiya 2008-yildan boshlab rasman faoliyat ko‘rsatmoqda. Tailandda ham mazkur sportga bo‘lgan qiziqish kundan-kunga ortib bormoqda. Tailand qirolligining bevosita qo‘llab-quvatlashi evaziga bugunda mamlakatimizning barcha hududlaridagi ta’lim muassasalarida kurash bo‘yicha o‘quv yo‘nalishlari tashkil etilgan”, – deydi Tailand kurash federatsiyasi bosh kotibi Pulsak Satjanhamnukul.

Foto: Xalqaro kurash assotsiatsiyasi matbuot xizmati

2013-yildan boshlab Tailanddagi eng nufuzli sport tadbiri — “Universitet talabalari o‘yinlari” tarkibidan kurash rasmiy sport turi sifatida o‘rin egalladi. 21–31-avgust kunlari mazkur o‘yinlarning bu yilgi bahslariga start beriladi. Tailand & Pattaya xalqaro turniri ham oldindagi ana shunday musobaqalarga o‘ziga xos tayyorgarlik vazifasini ham o‘tab beradi.
“Turnir arafasida an’anaviy tarzda Tailand terma jamoasi va o‘zbekistonlik kurashchilar o‘rtasida ikki haftalik o‘quv yig‘in mashg‘ulotlari tashkil etildi. Xalqaro turnirda kurash vatani vakillari 6 ta vaznda ishtirok etmoqda. Milliy sportning o‘zga yurtlarda sevimli sport turiga aylanib borishini kuzatar ekansan, qalbingda g‘urur hissi yanada jo‘sh uradi”, — deydi Tailand terma jamoasi bosh murabbiyi Olim Hayitov.
Ma’lumot uchun, o‘quv-yig‘in mashg‘ulotlari 7-iyungacha davom etadi.
Batafsil | Подробно | Read more... Daryo