O‘zbekiston terma jamoasi o‘ynashni istamagan Qirg‘iziston endi Eronga qarshi o‘ynaydigan bo‘ldi

O‘zbekiston milliy terma jamoasi bilan 2-iyun kuni maydonga tushishi kerak bo‘lgan va keyinroq O‘FF xohishiga ko‘ra raqibsiz qolgan Qirg‘iziston terma jamoasi 7-iyun kuni Eronga qarshi o‘rtoqlik o‘yinida maydonga tushadi. Bu haqda “Championat.asia” Tehran Times nashriga asoslanib xabar berdi .

Foto: Getty Images

O‘zbekiston terma jamoasi belgilangan o‘rtoqlik o‘yinidan voz kechgach , Qirg‘iziston termasi o‘z rejalariga o‘zgartirish kiritishga majbur bo‘lgan va yig‘inni bir hafta keyinroqqa qoldirgan, qo‘shimchasiga legioner futbolchilar unga jalb qilinmaydigan bo‘lgandi. Bu orada Qirg‘iziston terma jamoasi 7-iyun kuni Qozog‘istonning “Ordabasi” klubi bilan maydonga tushishni kelishib olgandi .
O‘zbekiston milliy terma jamoasining JCh—2018 yo‘lidagi raqibi Eron esa 7-iyun kuni aynan Qirg‘iziston bilan bellashishga qaror qildi. Shu kuni Qozog‘iston terma jamoasi JCh—2018 3-saralash bosqichidagi O‘zbekistonning yana bir raqibi Xitoy bilan maydonga tushadi. Qayd etish kerak, avgust oyi oxirida Qirg‘iziston va Qozog‘iston terma jamoalari ham o‘zaro o‘rtoqlik uchrashuvi o‘tkazadi.
Qirg‘izistonga qarshi uchrashuvni bekor qilib, Ekvatorial Gvineya bilan 2-iyun kuniga kelishuv tuzgan va Toshkentdagi o‘rtoqlik uchrashuvi uchun 28-may kunidan boshlab chiptalarni sotuvga chiqargan O‘FF “Chempionat.asia” ma’lumotiga ko‘ra o‘ziga yangi raqib topdi . 2-iyun — payshanba kuni Samvel Babayan shogirdlari O‘zbekistonda to‘p surayotgan legioner futbolchilar termasiga qarshi maydonga tushadi.
PFL reglamentiga ko‘ra, O‘zbekiston Oliy Ligasida xorijlik posbon o‘ynay olmaydi. Shundan kelib chiqilsa, O‘zbekiston milliy terma jamoasiga qarshi o‘yinda qaysi posbonning maydonga tushishi so‘roq ostida.
Batafsil | Подробно | Read more... Daryo