Alibaba’ning eng yirik aksiyadori kompaniyaning 7,9 mlrd dollarlik aksiyalarini sotib yuboradi

Xitoyning Alibaba Group internet-giganti eng yirik aksiyadori, Yaponiyaning SoftBank Group Corp. telekommunikatsiya kompaniyasi o‘zining kompaniyadagi ulushini kamaytirmoqchi. Bu haqda SoftBank press-reliziga tayanib, “RBK” xabar berdi . Press-relizga ko‘ra, SoftBank aksiyalarni sotishdan kamida 7,9 milliard dollar ishlab olishni ko‘zlamoqda.

Foto: Reuters

Alibaba Softbank’dan o‘zining 2 milliard dollarlik oddiy aksiyalarini sotib oladi. 400 million dollarlik yana bir paket Alibaba Partnership — kompaniyaning 34 ta hamasoschisi va top-menejerini birlashtiruvchi guruhga sotiladi. 500 million dollar qiymatiga ega yana bitta paketga “yirik milliy forovonlik fondi” xaridor bo‘ladi, ammo fondning nomi oshkor etilmayapti. 5 milliard dollarlik oxirgi paket va yana 1 milliard dollarlik qimmatbaho qog‘ozlarni sotib olish uchun opsion institutsional investorlarga taklif etiladi.
SoftBank aniqlik kiritishicha, aksiyalarni sotish haqidagi qaror tez pulga aylana olish qobiliyatini oshirishga hamda “moliyani tadbirkorlik va tejamkorlik bilan boshqarish”ga qaratilgan strategiya doirasida qabul qilingan.
Ayni paytda SoftBank kompaniyaning eng yirik aksiyadori hisoblanadi. 31-mart holatiga ko‘ra, uning Alibaba’dagi ulushi 32,2 foizni tashkil etgan. Oldi-sotdidan so‘ng u taxminan 28 foizgacha kamayadi.
Batafsil | Подробно | Read more... Daryo