Toshkentning “Oq-tepa” futbol klubi O‘zbekiston birinchiligi o‘yinlaridan chiqarib yuborildi

O‘zbekiston 1-ligasida ishtirok etuvchi Toshkentning “Oq-tepa” futbol klubi musobaqa bilan xayrlashdi. Bu haqda 31-may kuni jamoa matbuot xizmati “Championat.asia” orqali ma’lum qilgandi , 1-iyun kuni esa PFL rasmiy sayti uni tasdiqladi .

Foto: “Oq-tepa” FK matbuot xizmati

“Jamoamiz mazkur masala yuzasidan O‘FFga rasmiy xat orqali murojaat bilan chiqdi. Xatda chempionatdagi ishtirok to‘xtatilishining asl sabablari batafsil ko‘rsatib o‘tilgan. Garchi “Oq-tepa” 1-ligadagi ishtirokini yakunlagan bo‘lsa-da, klub sifatida faoliyatini to‘xtatgani yo‘q”, — deb yozilgandi klub matbuot xizmati xabarida.
PFL rasmiy sayti esa buni moliyaviy muammolar sababli deb yozdi. O‘zbekiston Professional Futbol Ligasi Ijroqo‘mi qaroriga ko‘ra, “Oq-tepa” klubi moliyaviy muammolar, shuningdek, musobaqada ishtirok etish uchun to‘lanishi lozim bo‘lgan badal pullarini belgilangan muddatda to‘lay olmagani, tibbiy ko‘rik hamda jarima sanksiyalari uchun to‘lanishi lozim bo‘lgan qarzlarni to‘lay olmagani tufayli O‘zbekiston Birinchiligi—2016 ishtirokchilari ro‘yxatidan chiqarildi.
PFL reglamentiga ko‘ra, “Oq-tepa” mavsum davomida o‘ynalishi kerak bo‘lgan o‘yinlarning yarmini ham o‘ynamagani uchun, uning barcha natijalari bekor qilingan. Uchrashuvlardagi ogohlantirish va chetlatishlar esa o‘z kuchida qoldirilgan.
Ma’lumot uchun, 2015-yilgi mavsum yakunlariga ko‘ra O‘zbekiston birinchiligida 2-o‘rinni qo‘lga kiritgan “Oq-tepa”, Oliy Ligaga o‘tish o‘yinida ishtirok etgan va Jizzaxning “So‘g‘diyona” klubiga imkoniyatni boy bergandi . 2016-yilgi mavsumda esa 1-liga doirasida 11 ta uchrashuv o‘tkazdi hamda 18 klub orasida 16-o‘rinni egallab turgandi.
Batafsil | Подробно | Read more... Daryo