Angola prezidentining qizi Sonangol davlat korporatsiyasi direktorlar kengashi raisi etib tayinlandi

Angola prezidenti Joze Eduardu dush Santushning qizi Izabel Sonangol davlat neft korporatsiyasi direktorlar kengashi raisi etib tayinlandi. Bu haqda “Interfaks” xabar bermoqda .

Foto: AFP

Oldinroq davlat rahbari kompaniya restrukturizatsiyasi va faoliyati samaradorligini oshirish dasturi doirasida Sonangol direktorlar kengashini to‘lig‘icha iste’foga chiqarib, barcha top-menejerlarni almashtirdi.
1973-yili Bokuda tug‘ilgan Izabel dush Santush Afrikaning eng boy ayoli, qit’aning eng yosh milliarderi va mazkur ro‘yxatdagi ikki ayoldan biri hisoblanadi. Forbes uning mol-mulkini 3,1 milliard dollarga baholagan.
Ekspertlarga ko‘ra, Izabelning yuqori lavozimga tayinlanishi mamlakatga 1979-yildan beri rahbarlik qilib kelayotgan prezident iqtisodiyotni nazoratida tutishiga imkon beradi. Uning o‘g‘illaridan biri Farovonlik davlat jamg‘armasini boshqarib kelmoqda. 
Angola neft qazib olish hajmi bo‘yicha Afrikada odatda Nigeriyadan keyingi ikkinchi o‘rinda turadi, xomashyoning aniqlangan zaxiralari 1,7 milliard tonnadan iborat. Biroq hozir Nigeriyadagi isyonchilar bilan bog‘liq muammolar tufayli Angola peshqadam bo‘lib oldi.
Batafsil | Подробно | Read more... Daryo