Ar-Riyod BMTga bolalar huquqlarini buzuvchi mamlakatlar ro‘yxatini tuzishda bosim o‘tkazgan

Yamanda arab koalitsiyasi aviahujumlari natijasida bolalar huquqlari buzilishi, shuningdek, ularning o‘limida aybdor bo‘lgan mamlakatlar “qora ro‘yxat”idan Saudiya Arabistonini chiqarish haqidagi qaror Ar-Riyod tarafdorlari tomonidan qat’iy bosim ostida qabul qilingan. Bu haqda BMT bosh kotibi Pan Gi Mun ma’lum qildi, deb yozadi “Interfaks”.

Foto: EPA

Uning aniqlik kiritishicha, Saudiya Arabistoni va uning tarafdorlari BMTni, aks holda tashkilotning qator dasturlarini moliyalashtirishni to‘xtatish bilan po‘pisa qilgan.
“Bu men qabul qilgan eng qiyin va og‘riqli qarorlardan biri bo‘ldi”, — dedi Pan Gi Mun. U o‘z qadamini ko‘mak dasturi yopilgan taqdirda, Falastin, Janubiy Sudan, Suriya, Yamandagi millionlab bolalar azobda qolishi bilan izohladi.
Saudiya Arabistoni va uning rahbarligida Yamanda isyonchi xusiylarga qarshi kurashayotgan arab koalitsiyasi Yaman hududiga aviahujumlar uyushtirib, bolalarning yalpi o‘limiga sabab bo‘lgani uchun mamlakatlar “qora ro‘yxat”iga tushib qolgan edi. Keltirilgan ma’lumotga ko‘ra, arab koalitsiyasi 780 dan ortiq bolaning o‘limi holatlarining 60 foizida aybdor bo‘lib chiqqan. Ar-Riyod esa ma’lumotlar haqiqatga to‘g‘ri kelmasligini aytib, ular qayta ko‘rib chiqilishini talab qildi. Shundan so‘ng BMT uni ro‘yxatdan chiqargan edi.
Batafsil | Подробно | Read more... Daryo