Obama: AQSh Osiyo va Afrikaning 7 mamlakatida “Al-Qoida” hamda IShIDga qarshi operatsiyalar o‘tkazmoqda

AQSh qurolli kuchlari Osiyo va Afrikaning yetti mamlakatida aksilterror operatsiyalari o‘tkazmoqda. Shuningdek, Afrikadagi bir necha davlat hukumatlariga ekstremizmga qarshi kurashda yordam ko‘rsatmoqda. Bu haqda prezident Barak Obama mamlakat qonunlariga muvofiq AQSh Kongressi senati va vakillar palatasi yetakchilariga ma’lumot berdi, deya xabar qiladi “TASS”.

Foto: EPA

Matni Oq uyda tarqatilgan maktubda bildirilishicha, AQSh qurolli kuchlari Afg‘oniston, Iroq va Suriyada “Al-Qoida” hamda IShIDga qarshi operatsiyalarni davom ettirmoqda. Turkiya hukumati o‘tgan yil iyulida o‘z hududiga Amerika samolyotlari joylashtirilishiga ruxsat bergan. Ushbu samolyotlar Suriyadagi jangarilarning marralariga zarbalar berish uchun foydalanilmoqda. Mamlakat maxsus bo‘linmalari Somali, Yaman va Jibutida bo‘lib turibdi, kam sonli harbiy mutaxassislar Niger va Kamerun rasmiylariga ko‘mak bermoqda.
Bundan tashqari, amerikalik harbiy xizmatchilar Misrning Sinay yarim oroli va Kosovodagi tinchlikparvar kuchlari hamda harbiy kuzatuvchilar tarkibiga kiradi. Taxminan 2,2 ming kishidan iborat yirik harbiy kontingent mintaqada xavfsizlik va barqarorlikni ta’minlash uchun Iordaniya hukumati iltimosiga binoan ushbu mamlakatda joylashtirilgan.
Obama ma’muriyati 2017-moliyaviy yilda harbiy maqsadlar uchun 582,7 milliard dollar ajratish niyatida, bu joriy yildagiga nisbatan 0,6 foizga ko‘p. Mazkur summadan 58,8 milliardi xorijdagi harbiy operatsiyalar uchun mo‘ljallangan. IShID guruhiga qarshi kurash uchun 7,5 milliard dollar so‘ralgan, bu hozirgidan ko‘ra 50 foizga ko‘p.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Batafsil | Подробно | Read more... Daryo