Isroil parlamenti spikeri YuKOS kompaniyasi sobiq egalaridan birining qiziga uylandi

Isroil parlamenti spikeri Yuliy Edelshteyn YuKOS kompaniyasi sobiq egalaridan biri Leonid Nevzlinning qizi Irinaga uylandi. Bu ularning ikkinchi nikohi, Edelshteynning 30 yil birga yashagan xotini ikki yil avval saraton tufayli vafot etgan, deya xabar beradi “RIA Novosti”. 

Yuliy Edelshteyn. Foto: “RIA Novosti”

Mahalliy televideniyening 10-kanaliga ko‘ra, nikoh marosimi 14-iyun, seshanba kuni Quddus markazida, qarindosh va yaqin do‘stlar, jami 180 nafar mehmon ishtirokida bo‘lib o‘tdi. Oy oxirida katta ko‘lamdagi to‘y marosimi o‘tkazilishi va unga mingga yaqin kishi, jumladan, Isroil parlamenti to‘liq tarkibi taklif etilishi ko‘zda tutilgan. 
1987-yilda Sovet Ittifoqidan ko‘chib borgan va rusiyzabonlarning “Israel ba-Aliya” partiyasiga asos solgan, ketma-ket yetti bor deputat etib saylangan, aloqa vaziri bo‘lgan Edelshteyn ikki muddatdan beri mahalliy parlament — Knessetni boshqarib kelmoqda. Irina Nevzlina Rossiyani 2003-yilda tark etgan, hozir Isroilda NADAV xayriya jamg‘armasi va Yahudiylar muzeyi direktorlar kengashini boshqaradi. Uning otasi Leonid Nevzlin Rossiyada qotillik va qotillikka qasd qilishda ayblanib, sirtdan hukm qilingan. Uning o‘zi aybini tan olmadi, Isroil esa ekstraditsiya qilishdan bosh tortdi.
Batafsil | Подробно | Read more... Daryo