Hindistonlik biznesmen Otalar kunida 472 qizidan tabrik qabul qilib oldi

Gujorat shtatining Ahmadobod shahrida (Hindiston) istiqomat qiluvchi biznesmen Maxesh Savani butun dunyo miqyosida nishonlanadigan Otalar kuni munosabati bilan bir yo‘la 472 qizining tabriklarini qabul qilib oldi. Bu haqda “TASS” xabar bermoqda .

Chap tomonda o‘tirgan erkak — Maxesh Savani. Foto: Khaleej Times

Bu “qizlar” o‘z otalarini yo‘qotgan bo‘lib, mana o‘n yildirki Savanining vasiyligida yashab keladi. Biznesmenning ukasi kutilmaganda hayotdan ko‘z yumib, ikki qizini yetim qoldirib ketganidan so‘ng tijoratchi shu ahvolga tushgan boshqa qizlarga ham yordam berishga qaror qildi. U o‘zining yuzlab “qizlari”ga nafaqat moddiy yordam ko‘rsatadi, balki ularning to‘ylarini munosib shaklda o‘tkazadi, oilaviy hayotlariga ham e’tibor qaratadi.
Ko‘chmas mulk, brilliantlar savdosi bilan shug‘ullanuvchi hamda o‘quv muassasalari tarmog‘iga egalik qiluvchi Savani oddiy dehqon oilasida tug‘ilib o‘sgan. Uning otasi Vallabbhay Arabiston dengizi qirg‘og‘ida joylashgan Rapard qishlog‘idan tirikchilik maqsadida Ahmadobodga tashrif buyurgan edi. Qirq yil muqaddam olmos qirralovchi sifatida ish boshlagan Savani endilikda har bir qizining to‘yiga 400 ming rupiya (6 ming dollardan ko‘proq) ajratishga qodir. Joriy yil boshidan buyon u 216 ta mana shunday to‘y o‘tkazdi va har birida kelinning vakil otasi sifatida ishtirok etdi.
Batafsil | Подробно | Read more... Daryo