Kareliyadagi ko‘lda ro‘y bergan fojiadan so‘ng bedarak yo‘qolgan bolaning jasadi topildi

Rossiyaning Kareliya Respublikasida joylashgan Syamozero ko‘lida ro‘y bergan fojiadan so‘ng bedarak yo‘qolgan bolaning jasadi topildi. Bu haqda “RBK” xabar bermoqda .

Foto: “Newsru.com”

Bolaning jasadi Laxta qishlog‘i yaqinidagi sohildan 100 metr uzoqlikda topildi va qirg‘oqqa keltirildi.
Eslatib o‘tamiz, 18-iyun kuni Kareliyada joylashgan “Park-otel Syamozero” oromgohida dam olayotgan 47 bola va to‘rt nafar yoshi katta kuzatuvchidan iborat guruh Syamozero ko‘lidan kechib o‘tayotgan paytda po‘rtana boshlangani va buning oqibatida 14 nafar bola halok bo‘lgani haqida xabar berilgandi . Ular 12–15 yoshlar atrofida bo‘lgan.
Qayd etish kerakki, dastlab qutqaruvchilar faqatgina 13 nafar bolaning jasadini topgan edi . Bedarak yo‘qolgan 14-bola esa ko‘l atrofi va o‘rmonda qidirildi. Keyinroq favqulodda xizmat xodimlari qutqaruv nimchasini aniqladi. Shundan so‘ng bola tirik qolgani va o‘rmonda adashib qolgani taxmin qilingandi.
Bolalarning halok bo‘lgani yusazidan Petrozavodsk shahar sudi oromgoh direktori Yelena Reshetovani 19-avgustga qadar hibsga oldi . Rossiya tergov qo‘mitasi esa “Xavfsizlik talablariga javob bermaydigan, ehtiyotsizlik oqibatida ikki va undan ortiq shaxs o‘limiga olib kelgan xizmatlar ko‘rsatish” moddasi bo‘yicha jinoiy ish ochdi .
Batafsil | Подробно | Read more... Daryo